Anda di sini

Rebut peluang dalam sektor betanam betupi moden

Advertisement
 Jack (tujuh kiba) begambar enggau kaban komiti pengatur.
KE ALBUM: Jack (tujuh kiba) begambar enggau kaban komiti pengatur.

BINTULU: Raban nembiak kelebih agi graduet di bagi menua tu patut ngerebut peluang dalam sektor betanam betupi moden ti majak ngerembai di negeri itu diatu, pia ku Residen Bagi Menua Bintulu Jack Aman Luat.

Ku iya, enti suba tebal agi pengawa betanam betupi dikereja raban orang ke nadai pelajar, tang diatu sektor nya ulih meri penatai pemisi ke besai nengah chara betanam betupi moden.

“Raban graduet ke diatu ukai patut semina berundingka kereja dalam bidang ti dipelajarka sida aja, tang sida ulih nyingkang jauh agi nengah chara ngaul diri enggau bidang alternatif baka betanam betupi moden,” ku iya.

Iya bejaku munyi nya lebuh bejadi Pengerami Makai Lemai Pengasih Serakup Graduet Dayak Sarawak (SDGA) Bintulu 2019 di sebuah restoren tebilang ditu, kena malam Hari Enam nyin tadi.

Pengerami nya digulu urung 300 iku kaban serakup nyengkaum pengari ejensi enggau opis kaunsil kandang menua, gerempung ukai dikuasa perintah (NGO), gerempung korporat enggau dagang di Bintulu.

Dulu ari nya, Presiden SDGA Gary Ningkan madah, raban graduet diperansang nangkup pinta ngaul diri dalam bidang agropreneur enggau orang dagang dikena ngemajuka agi tikas ekonomi sida belama.

Ku iya, rebak baru diatu kelebih agi di Sarawak patut ngena manah peluang ke chukup besai dibuka ngagai sida ngambika malutka diri dalam bidang bedagang ti ngembuan potensial ke manah dikemansangka di nengeri tu.

“Aku mega meri pengaga ati ngagai SDGA Bintulu laban regas ngatur mayuh bengkah program bekaul enggau guna pelajar kenyau ari lima taun ke udah,” ku iya.

Ba pengerami nya, SDGA Bintulu bisi nerima bantu RM10,000 ari Sapit Kepala Menteri Datuk Amar Douglas Uggah Embas, ti dibantaika Jack Aman ti naydi pengari iya ba pengerami nya,ngambika bisi dikena sida ngatur aktiviti serakup taun baru.

Sama bisi ngulu pengerami nya Pemesai Opis Pelajar Sebauh Tero Bayel, Sapit Kepala Polis Bintulu DSP Jame Reis enggau Chairman SDGA Bintulu Thwaites Langak.

Advertisement