KUCHING: Polis Sarawak ngambi atur tumu deka nyikap semua raban polis dikena nentuka Pengawa Bepilih Nengeri Ke-12 (PRN-12) ti dipelabaka diatur ba taun 2021 ila mujur.
Direktor Opis Integriti enggau Nitihka Standard Polis Diraja Malaysia (PDRM) Datuk Zamri Yahya madah, nya nyadi batang pekara ti dikemeratka ti diberi Kepala Polis Sarawak baru, Datuk Ramli Din ngambika nadai pekara ke enda manah nyadi maya nya ila.
“Pekara dikemeratka iya udah tu iya nya PRN-12 ti dipelaba diatur ba taun 2021, nyikap raban PDRM di nengeri tu ngambika ulih nentuka pengelikun enggau pengelantang mensia mayuh.
“Engka iya deka ngaga pengawa enggau teratur dikena nentuka proses PRN-12 dipejalaika enggau likun sereta nadai pekara nyadi maya nya ila,” ku iya.
Iya bejaku munyi nya ba aum media pengudah pengerami nyerah sereta nerima pengawa Kepala Polis Sarawak ke baru ba Indu Opis Polis Kontinjen (IPK) Sarawak ditu kemari.
Ba pengerami nya, Ramli ke mega ex-Ketuai Urusetia Kepala Polis Menua (Pansik enggau Pemansang) Bukit Aman, dichiri nyadi Kepala Polis Sarawak ke baru nyilih Datuk Azman Yusof ti nganti penuduk iya di Bukit Aman.
Kelimpah PRN-12 ku Zamri, pekara bukai ti deka dikemerat iya nya isu pengelikun garis entara menua di nengeri tu berindik ari pengawa mindahka indu menua Indonesia ke Kalimantan.
Ku iya, peraambu atur tumu mesti diambil dikena nentuka pengelikun di nengeri tu seruran dijaga ari mayuh empas berindik enggau pengawa mindahka indu menua nya.
“Pengawa mindahka indu menua Indonesia ke Kalimantan nya mega dipelaba meri empas positif enggau negatif ngagai Sarawak baka aktiviti pejalai raban ari menua sepiak nyin tama kitu nyengkaum aktiviti mai barang tama belalai nengah pintu penama ba garis entara menua.
“Nya alai, aku ngarapka Kepala Polis Sarawak ke baru ulih merambu sereta berandau enggau unit pengelikun sereta penerit adat nengeri nyengkaum perintah nengeri ngambi nyendiaka atur tumu dikena napi pekara nya,” ku iya nyemetak.
Ku iya baru, PDRM dipelaba deka nambahka penyampau raban sida ba pintu penama ba garis entara menua di nengeri tu dikena negapka pengelikun rayat ditu.
Berebak enggau nya, Ramli ba aum media nya madah ke alai iya sedia mangku tanggungpengawa nya dikena nentuka pengelikun enggau pengelantang rayat Sarawak seruran diintu manah.
“Pengelikun nengeri Sarawak ti chukup manah ari baruh pegai Datuk Azman ke sebedau tu deka dipajakka aku seagi ke gawa di nengeri tu.
“Pekara ke dikemeratka tu seriris enggau juluk ati ketuai tetinggi PDRM lalu entara pekara ke dikemeratka aku iya sentang meri servis enggau integriti, kelimpah ti bekaul enggau PRN-12 Sarawak ke deka diatur ila nyengkaum indu menua Indonesia ti deka dipindahka ke Kalimantan,” ku iya.
Berebak enggau nya, iya mega deka nentuka kes bekaul dadah di nengeritu ulih diputarka enggau manah kelimpah ngintu pesaka menua ti berega ke bisi di Sarawak.
Berebak enggau nya, Azman madahka pengawa jai kasar dipeda nambah di Sarawak ari timpuh 1 Jan nyentuk 31 Okt taun tu ngagaia 713 kes dibandingka enggau 687 kes ba timpuh sama taun siti nyin tadi.
“Kategori kespengawa jai ke nambah iya nya kes samun ngerumpak ngena senyata api nambah dua kes, bunuh (nambah tiga kes), masung (nambah semilan kes) enggau kes ngerumpak nadai senyata (nambah 31 kes),” ku iya.
Ku iya baru, taja gaya pengawa jai di Sarawak agi ulih dijaga iya nya bisi 4,834 kes Indeks pengawa jai diripot kenyau ari 1 Jan-31 Okt 2019 dibandingka enggau 4,776 kes ungkup timpuk ke sama taun siti nyin tadi.
“Banding nya mandangka penambah 59 kes tauka 1.24 peratus,” ku iya.