KUCHING: Pesta Nenas enggau Buah Sarikei diatur baru ungkup edisyen ke-16 berengkah ari 22 November nyentuk 1 Disember tu.
Menteri Muda Pemansang Mengeri, Pengatur Tanah enggau Rampa Menua, Datu Len Talif Salleh madahka pesta nenas tu siti chara perintah nengeri neruska promosyen Bagi Menua Sarikei nyadi ‘Food Basket Sarawak’.
“Sarikei endang tebilang ngeluarka buah enggau nenas.
“Taun tu, program ke diatur ditambah ngagai enam batang komponen baka produk enggau servis,orang dagang enggau pengawa bedagang, pelajar, pekit, main asal enggau beperindang sereta lumba main enggau rekreasyen,” ku iya.
Len ke nyadi patron komiti Pesta Nenas enggau Buah Sarikei bejaku munyi nya ba aum media bekaul pengerami nya ba opis iya, Ringkat 17, Wisma Sumber Alam ditu kemari.
Tambah Len ke mega Kaban Kunsil Nengeri Kuala Rajang, peng erami ke diatur pengelama 10 hari di Pasar Sarikei endang dikena ngangkatka ekonomi ukai semina di Sarikei tang semua kandang menua di Kuala Rajang.
Taun siti nyin tadi ku iya, pengerami nya mujur matak penatai 90,000 iku temuai lalu taun raban pengatur nagit penatai 100,000 pengunjung iku.
Ari sukut bejual ku iya, pengerami taun siti nyin tadi mujur ngumpul asil bejual RM1.4 juta lalu nagit RM1.5 juta asil bejual taun tu.
Pengerami tu diatur betuaika Opis Residen Sarikei nengah kerejasama strategik opis, ejensi perintah, gerempung ukai dikuasa perintah (NGO) enggau raban peribit di Bagi Menua Sarikei.
Penerang silik sentang pengerami tu tau ditanya ngagai Seksyen Transformasyen Sosial Bagi Menua,Opis Residen Bagi Menua Sarikei nengah lumur 084-655432/651104.
Sama bisi ba aum media nya, ADUN Pakan, Tan Sri William Mawan Ikom, Residen Sarikei Felicia Tan Pemesai Pelilih Sarikei, Christopher Ranggau Unting.