Anda di sini

Perintah Nengeri ngembuan juluk ngurangka kes nembiak betubuh bisi

Advertisement
 Indit (duduk tiga kanan), Ashree (dua ari kiba) sereta ke bukai begambar enggau pesereta program pengudah tembu program nya.
BEGULAI ENGGAU BALA PESERETA PROGRAM: Indit (duduk tiga kanan), Ashree (dua ari kiba) sereta ke bukai begambar enggau pesereta program pengudah tembu program nya.

SRI AMAN: Ba pengawa mutarka isu nembiak betubuh bisi, perintah nengeri udah netapka tagit ngurang penyampau kes nembiak betubuh bisi ngagai 10% ninting taun enti dibandingka enggau rikod kes ba taun ke sebedau nya.

Residen Bagi Menua Sri Aman, Indit Bangai madah, statistik ari Opis Pengerai Sarawak mandangka tren penyampau nembiak ti betubuh bisi udah majak nurun kenyau ari taun 2014 iya nya ari 3401 kes ngagai 2,130 kes ba taun 2017.

Tang ku iya,ba taun 2018, statistik nembiak betubuh bisi di Sarawak bisi niki mimit iya nya 1.08 peratus aja tauka 23 kes dibanding taun 2017.

Betubuh bisi di Sarawak ba taun 2018 bisi 2,153 dibanding 2,130 ba taun 2017,” ku iya.     

Iya madah munyi nya maya bejaku ba pengerami Nutup Program Intervensyen Rama:Pemereti Ati enggau Advokasyen Pelajar Seksual (KAPS) Bagi Menua Sri Aman taun 2019 ke diatur Opis Pelajar Pelilih Sri Aman enggau Sekula Sekondari (SMK) Lingga enggau kerejasama Perintah Sarawak nengah Kaunsil Pemansang Rama Sarawak, Opis Menteri Pengintu Pengelantang Pendiau Komuniti, Orang Indu, Ruang Bilik enggau Pemansang Anak Mit (KWKPK) sereta Opis Residen Bagi Menua Sri Aman ba SMK Lingga, ditu.

Ku iya, enggau silik agi lima buah bagi menua di Sarawak udah nyapai tagit penurun sepenyampau 10 peratus tauka lebih ari penyampau kes nembiak betubuh bisi taun tu enti dibanding ba taun ke sebedau tu.

“Bagi Menua tu iya nya Bagi Menua Betong(nurun sepenyampau 31%),Bagi Menua Sibu (20.4%); Bagi Menua Serian (15.1%); Bagi Menua Samarahan (14%); enggau Bagi Menua Sri Aman (10%).

“Tiga bagi menua ke bukai ngerikodka penurun baruh ari 10% iya nya Bagi Menua Miri (6.9%); Bagi Menua Sarikei (5%); enggau bagi Menua Limbang (2.3%),” ku iya.

Taja pia, empat Bagi Menua ke bukai bisi ngerikodka niki baka Bagi Menua Kuching (niki 49.5%); Bagi Menua Mukah (18.2%); Bagi Bintulu (2.2%); enggau Bagi Menua Kapit (1.9%).

Ku iya nambah, statistik kes tu nurun ba bala nembiak sekula tebal agi udah nyadi tren pengudah KAPS dipejalaika di sekula sekondari di Sarawak, iya nya nurun sepenyampau 42.7%. Kena taun 2018, bisi 59 iku nembiak dibanding 103 iku nembiak sekula ti betubuh bisi ba taun 2017.

“Tren ke nurun tu meri pengandal ngagai Opis Menteri nengah Kaunsil Pemansang Rama Sarawak enggau kaban strategik dalam ‘One Stop Teenage Preganancy Committee (OSTPC)’, ngambika program ‘intervensi outreach’ terus dipejalai dikena meri Pemereti Ati enggau Advokasyen Pelajar Seksual (KAPS) ngagai sekula sekondari di selampur Sarawak,” ku iya.

Iya nambah, entara taun 2016 enggau 2018, Opis Menteri nengah bekerejasama kaban OSTPC Renggat Nengeri enggau Bagi Menua dikena ngatur 30 renggat KAPS (27 renggat KAPS Besai enggau 3 renggat KAPS Mit).

“Taun tu, naka 8 November 2019, bisi 29 renggat KAPS udah dipejalaika (21 renggat KAPS Besai enggau 8 renggat KAPS Mit),” ku iya nambah.

“Tebal agi Kaunsil Pemansang Rama Sarawak merambu deka bejalaika dua renggat program Pemereti Ati enggau Advokasyen Pelajar Seksual ungkup Bagi Menua Sri Aman ba taun tu iya nya di SMK Engkelili, di Pelilih Lubok Antu udah dipejalaika kena 10 ngagai 11 Oktober tu tadi lalu di SMK Lingga di Pelilih Sri Aman.

“Ba rikod, Kaunsil Pemansang Rama Sarawak enggau kaban strategik udah bejalaika program KAPS tu di SMK Melugu kena 2017 lalu di SMK Simanggang, SMK Saint Luke enggau SMK Sri Aman kena taun 2018,” ku iya nerang agi.

Indit nambah agi, program Pemandang ‘One Stop Teenage Pregnancy Committee (OSTPC)’ enggau Undang-Undang Rama Renggat Bagi Menua Sri Aman mega udah diatur kena bulan Mac 2018. Program Pemandang nya siti program dikena ngenyemelaka pengawa mutarka isu enggau penanggul nembiak betubuh bisi enggau chara efektif ba renggat Bagi Menua.

Ku iya baru, opis menteri deka chakah agi bejalaika pengawa begulai enggau kaban strategik dikena ngatur ‘Intervensi Outreach’ di sekula sekondari di Sarawak ke bedau ngatur program KAPS enggau Program Randau Pemansang Rama tauka Randau Pemansang Raban Bansa berengkah 2019 ba genturung pendiau enggau rumah panjai di menua pesisir dikena mutarka tren penyampau nembiak ngandung ti niki ke nadai besekula nengah pemisi sekeda program ke bekaul pemereti ati sereta advokasyen pelajar seksual.

“Ungkup Bagi Menua Sri Aman, Program Randau Pemansang Rama udah diatur di Rumah Bandi, Sebangkoi, Ulu Undop, Sri Aman bulan Mac tu tadi.

“Semua pengawa tu mandangka komitmen perintah Sarawak deka ngurangka kes nembiak betubuh bisi di Sarawak. Nya alai, semua ejensi patut bekerejasama bejalaika tanggungpengawa dalam mutarka isu tu. Tanggungpengawa dikena nagang isu nembiak ngandung sereta isu rama ke bukai nya tanggungpengawa semua kitai ungkup pengelantang nembiak enggau komuniti kitai di Sarawak,” ku iya baru.

Sama bisi ngulu program tu iya nya, Pemesai Opis Pelilih Sri Aman,Mohd Ashree Wee sereta ke bukai.

Advertisement