KUCHING: Perintah nengeri terus komited meri bantu ngagai raban orang ke bepenatai pemisi mit di nengeri tu.
Kaban Kunsil Nengeri Pakan Tan Sri William Mawan Ikom madah, bantu nya diberi dikena nentuka raban nya bulih peluang belajar yang sebaka nyrentuk ke renggat ke pemadu tinggi.
“Ninting taun Yayasan Sarawak ngungkupka bejuta ringgit dikena ngemujurka program nya.
“Bantu pelajar ke baka tu mandangka perintah nengeri siru enggau penggau enggau guna rayat kelebih agi apai indai enggau penyaga sida dikena nanggung ungkus tating pengidup enggau rega barang ke majak mar,” ku iya.
Iya bejaku munyi nya ba Pengerami Nyuaka Baucher Bantu Pakayan Sekula Yayasan Sarawak 2019 di Dewan Raban Bansa Pakan kena 15 November tu tadi.
Sama bisi datai, Sapit Direktor Sarawak Watson Peter Chunggat, pengari Residen Sarikei Safidi Tumboh, Pemesai Pelilih Pakan Seroji Ludin,pengari Pemesai Pelilih Julau Lois Yeo sereta Chairman Kaunsul Kepala Pengajar Julau/Pakan Zamerene, Pemancha Tekong Ranggi, Penghulu Dandan Bujang, Penghulu Wilfred Ulie, Penghulu Undie, Penghulu Ting Tiu Look enggau bala tuai rumah ari sitak Pakan.
Ku Mawan, pemeri baucher nya ngagai bala nembiak sekula sitak nya mandangka komitmen perintah nengah Yayasan Sarawak dikena mantu nembiak sekula ke patut nerima.
Ku iya, Yayasan Sarawak ngaga mayuh program pelajar dikena nentuka tetiap iku anak Sarawak kelebih agi ti mit penatai pemisi ngembuan peluang pelajar ke sebaka nyentuk ke datai ba renggat ti pemadu tinggi.
“Reti nya nadai kebuah apai indai madahka anak sida enda ulih besekula ketegal enda chukup belanja dikena besekula,” ku iya.
Ku iya, pelajar beguna amat dikena ngubah tikas pengidup mensia mayuh di menua tu.
“Nya kebuah, Perintah Sarawak udah bejalaika mayuh macham inisiatif ba pemansang pelajar di nengeri tu nyengkaum numbuhka Opis Menteri Pelajar, Sains enggau Pansikn Teknologi (MESTR) dikena nambahka akses ngagai pelajar bekualiti tetiap iku mensia mayuh,” ku iya.
Berebak enggau nya, iya madahka Baucher Bantu Pakayan Sekula Yayasan Sarawak nya enda tau ditukar enggau mata duit, nya alai apai indai mesti nyendiaka duit tambah nyema ungkus nya ngelui ari penyampau baucher nya.
Bisi 250 nembiak sekula ari pelilih Pakan enggau Julau nerima Baucher Bantu Pakayan Sekula ari baruh Program Nyuaka Bantu Pelajar Yayasan Sarawak ungkup sekeda sekula dalam sitak Kunsil Nengeri (DUN) Pakan.