SIBU: Lembaga Pelabuhan Rajang (LPR) ke manggai 50 taun tu dipelaba deka majak mansang sereta ngerembai lalu majak meri servis ngagai komuniti dagang ba kandang menua tengah ti ngelui agi peragam orang dagang.
Sapit Kepala Menteri Tan Sri James Masing madah, iya pechaya palan penyangkai kapal nya deka ngasilka penatai pemisi lebih ngaga perintah nengeri.
LPR ngembuan rizab ke mayuh ti majak nambah sereta mai pemanah ngagai komiti bedagang di menua tu, ku iya.
“LPR tu mih siti palan penyangkai kapal ba tebing sungai di nengeri tu ti bisi nyedia sereta ngembuan jalai ti amat beguna ba pengawa dagang tauka nyangkaika barang kenyau ari suba.
“Nya alai, raban LPR endang patut diandalka kitai laban nya ulih nyungkak penatai pemisi nengeri tu ngagai tikas dunya,” ku iya bejaku ba Pengerami Makai Lemai Ninting Taun LPR ba sebuah hotel ditu, kilah ensanus.
Ba pengerami nya, bini iya Puan Sri Corrine Masing, Sekreteri Mendam Opis Pemansang Penyangkai Kapal enggau Insfrastruktur Datu Safri Zainuddin, Direktor Besai LPR Datin Helen Lim, Chairman Opis Pemansang Menua Sibu Clarence Ting, sama bisi ngulu pengerami nya.
Masing ke mega Menteri Pemansang Penyangkai Kapal enggau Insfrastruktur madah, LPR udah dipejalaika sepengelama 50 taun lalu nyadi penyangkai kapal ti tampak rita sereta ngembuan rikod pengawa ti manah.
“Kami ari opis besai semampai mai sereta meri pemansang ngagai penyangkai kapal tu baikka ari perengka dikena ngenyamaika ngatur pengawa tauka nambahka injin ke diguna dia,” ku iya.
Ku iya baru, Kepala Menteri Datuk Patinggi Abang Johari Tun Openg udah merambu meri agih belanja ti besai dikena bejalaika projek ngaga pemansang ba penyangkai kapal nya ke sepenyampau RM78.5 juta.
Berebak enggau nya, Masing mega ngansak perintah menua mansik baru Polisi Kabitaj iya ke empai dikena ba nengeri tu, taja pan pengawa nya dikena nurunka rega barang ba Sarawak enggau Sabah.