SIBU: Berengkah ari taun tu tadi, Lembaga Pelabuhan Rajang (LPR) udah nikika tikas pemujur sepenyampau lima peratus ba dagang sida.
Menijar Besai LPR Datin Helen Lim madah, taja pan penatai pemisi dunya diatu enda meruan tang LPR agi ulih manggai ba tikas nya.
“Pengerugi ke ditapi kitai ba taun sebedau tu iya nya RM2.5 juta udah mujur digantika enggau penguntung sepenyampau RM1.3 juta naka bulan Oktober taun tu.
“Tu ukai reti kitai ngatur naka nya aja tang aku pechaya penatai pemisi LPR tu deka majak manah agi udah tu,” ku iya lebuh bejaku ba Pengerami Makai Lemai LPR ditu, ensanus.
Pengawa nya dipenyadika Sapit Ketuai Menteri iya ke mega Menteri Pemansang Penyangkai Kapal enggau Insfrastruktur, Tan Sri James Masing.
Pengerami lemai nya, bela bisi digulu bini iya Puan Sri Corrine Masing, Sekreteri Mendam Opis Menteri Pemansang Penyangkai Kapal enggau Insfrastruktur Datu Safri Zainuddin sereta Chairman Opis Pemansang Menua Sibu Clarence Ting.
Helen madahka LPR tu siti dagang ke nguji tikas pengelandik bedagang ti belalauka pasang surut penatai pemisi dunya, baikka di dalam tauka luar menua.
Kelimpah nya, iya andalka bala raban LPR ti semampai sedia napi sebarang penguji ti datai, kelebih agi enti pengawa nya ari perintah nengeri.
“Aku nesau raban ditu sama bela meri sukung 200 peratus dikena ngemansangka agi LPR berambai leka jaku kitai ‘The Preferred Port, Today And Everyday’,” ku iya.