BINTULU: Bisi 541 iku pesereta ngerichahka program ‘Solidariti Walk Sarawak’ renggat pelilih Bintulu nengah kategori bejalai penyauh 4 kilometer(km) ungkup mensia mayuh enggau 2 km ungkup Orang Timpang Pendiau (OKU) berengkah ari Palan Engkah Kerita Pantai Tanjung Batu kemari.
Program nya udah dipenyadi Direktor Besai Lembaga Kemajuan Bintulu(BDA) Rodziah Morshidi sereta digulu pengari Sekretari Mendam Opis Menteri Pengintu Pengelantang Pendiau Komuniti, Orang Indu. Ruang Bilik enggau Pemansang Anak Mit(KWKPK)Atiqah Dolhan, Ketuai Unit Servis Pengatur Opis Residen Bagi Menua Bintulu ngarika Residen Bagi Menua Bintulu Saifulbahry Alwie, pengari Pemesai Pelilih Bintulu Suzanna Indiat, ketuai opis enggau ketuai raban bansa kandang menua nya.
Rodziah madah, program nya inisiatif ari KWKPK ti mungkur beberapa sekeda pelilih di nengeri Sarawak ti dipilih nyadi pengatur program bepelasarka elemen solidariti.
Ku iya, ba sekeda pelilih, kerejasama tu mungkur beberapa buah ejensi perintah ke bekaul baka Opis Pelilih, Opis Pengintu Pengelantang Raban Bansa (JKM) sereta Opis Pelajar Pelilih Menua.
“Pia mega di Pelilih Bintulu, kerejasama tu nyengkaum Opis Pelilih Bintulu sereta BDA enggau sukung sekeda ejensi perintah nengeri enggau perintah besai,” ku iya bejaku ba program nya ensanus.
Iya nambah, keterubah penyereta semina dibuka ngagai 100 iku pesereta ke tumu ngerejista aja tang berindik ari smabut ke manah nyadi slot tambah dibuka ngujungka penyampau semua lebih 500 iku pesereta.
Ku iya nerang, nyereta program tu enda bebayar lalu slot program nyengkaum `sesi plogging’, aerobik enggau nyabut tikit benasit.
Nangkanka nya, tuju bukai program tu diatur iya nya dikena ngenegapka pengandal solidariti dalam komuniti di Sarawak, nerenak ulah ngemeratka pengerai ba komuniti sereta ngelakuka daya pengidup ti bepengerai.
Program tebuka ngagai komuniti kandang menua tu nitihka bagi menua enggau pelilih nya mega mungkur 20 iku OKU ti disempulangka orang ti ngiring enggau orang ti nyaga sida.