Anda di sini

‘Sidang Kemuncak Kesihatan Mudah Alih Digital ASEAN 2019’ pelasar bekunsi ka penemu, pengelandik

Advertisement
 Sapit Direktor Kanan, Ba Pengawa Perambu, Opis Menteri Pengerai Malaysia, Dr Fazilah Shaik Allaudin (kiba) bejuraika polisi perintah sentang bidang pengerai maya ‘Sidang Kemuncak Kesihatan Mudah Alih Digital ASEAN 2019’ di Kuching kemari. — Gambar Muhammad Rais Sanusi
BEJURAIKA POLISI PERINTAH: Sapit Direktor Kanan, Ba Pengawa Perambu, Opis Menteri Pengerai Malaysia, Dr Fazilah Shaik Allaudin (kiba) bejuraika polisi perintah sentang bidang pengerai maya ‘Sidang Kemuncak Kesihatan Mudah Alih Digital ASEAN 2019’ di Kuching kemari. — Gambar Muhammad Rais Sanusi

KUCHING: Orang ti landik bidang perubat ari menua ASEAN bekunsi pengelandik sida maya ‘Sidang Kemuncak Kesihatan Mudah Alih Digital ASEAN 2019’.

Aum tu diatur sepengelama dua hari di sebuah hotel ditu berengkah 16 ngagai 17 November lalu keterubah dipejalaika ti diatur Gerempung Orang Dagang China-ASEAN (ACEA).

Chairman pengatur ke mega Presiden ACEA, Dato Stanley Ling madah batang tuju aum tu iya nya deka nyungkak pemansang servis pengerai digital sereta dagang temuai perubat dalam menua ASEAN sereta luar ASEAN.

Nengah sukung ari Opis Menteri Pengerai Malaysia, Perintah Nengeri Sarawak enggau Gerempung Perubat Malaysia (MMA), pesereta besai ungkup aum tu iya nya bala lutur, indu misi enggau profesional dalam bidang perubat.

“Tuju kebendar aum tu iya nya nyungkak pemereti ati sentang trend pemansang jeman diatu dalam industri nyaga pengerai nengah bekunsi penemu enggau orang ke landik ba bidang tu ari ASEAN.

“Tu mega dikena ngepunka kerejasama nuju ngagai chunto ‘teleperubatan ASEAN’ enggau ngaga ekosistem garis entara menua ti ngenegapka peluang pengawa dagang dalam servis pengerai digital,” ku iya maya bejaku muka aum nya kemari.

Sepemanjai aum nya dipejalaika, tiga iku duta menua ASEAN ke Malaysia iya nya Houmdaophone Soukhaseum (Laos), Narong Sasitorn (Thailand) enggau Le Quy Quynh (Vietnam) bisi ngulu bejuraika pekara sida sentang pengerai digital ba menua sida.

Sebedau tu,bisi mega diatur forum sentang Tele-Pengerai dalam mayuh bengkah Industri Perubat ari orang ke landik ba bidang perubat nyengkaum ari Singapura.

Beserimbai enggau aum nya, pengawa ngemunka aplikasyen MaNaDr ke dikena orang ti sakit enggau penyelia perubat nengah telefon moden.

Pengawa ngemun aplikasyen nya dipenyadika Kepala Menteri Datuk Patinggi Abang Johari Tun Openg ke mega bisi ngulu ngenataika jaku iya ba aum nya.

Advertisement