MUKAH: Perintah nengeri nagit 100 peratus nembiak mit di nengeri tu diiri enggau pelajar tumu sebedau nyingkang ngagai sekula primari ba taun 2020.
Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit, Dato Sri Fatimah Abdullah madah, tu nyengkaum nembiak ke diau ba kandang menua pesisir.
“Perintah nengeri deka nentuka pemujur 100 peratus tu ba taun 2020 ila laban maya diatu udah nyapai 97.41 peratus,” ku iya maya Pengerami Konvokesyen SeDidik Bagi Menua Mukah Ke-28 2019, kemari.
Pekara nya ku iya nyengkaum semua nembiak mit ari kandang mengeri enggau kandang menua pesisir.
Dikena nyaut peminta perintah tu, SeDidik deka ngemayuhka agi palan pelajar tumu enggau numbuhka palan nya nyentuk ngagai 100 tauka lebih pampang di selampur nengeri.
Diatu SeDidik bisi 82 pampang.
Entara pampang nya, 65 palan nya ba kandang menua pesisir lalu ke bukai dalam mengeri.
Pemadu baru, komuniti Penan di Baram mega deka bisi nerima akses pelajar tumu nembiak mit nengah penumbuh lima begunan Tadika Komuniti Penan ke digaga ari baruh Program Tanggungpengawa Rama Korporat (CSR) Petronas, udah tembu ti dipegai SeDidik Sdn. Bhd. berengkah taun baru ila.
Sekeda palan taska ba endur gawa mega deka digaga nengah kerejasama beberapa ejensi ke bekaul enggau bantu belanja RM1 juta kena 2020.
Sentang Geran Ninting Taun Khas (GTK) perintah nengeri deka terus bejalaika nya ungkup semua palan pelajar tumu nembiak mit ke udah ngerejista enda ngira nya baruh perintah besai tauka perintah nengeri.
Berebak enggau nya, Direktor Besain SeDidik Nor Ashikin Abdul Rahman mega madah SeDidik nagit sepenyampau 3,500 iku nembiak mit ke ngerejista naydi nembiak baru kena taun baru.
“Tu seriris enggau nyaut juluk perintah nengeri ti deka meri akses 100 peratus pelajar tumu nembiak mit enda ngira kandang menua sekalika ba mengeri tauka menua pesisir nyengkaum ari sukut penatai sida.
Bisi 60 iku nembiak mit ke datai ari tujuh palan SeDidik Bagi Menua Mukah diberi setipikit ke tanda udah graduet.