MIRI: Opis Menteri Perengka Pengangkut Sarawak begunaka pengelandik ari Institusyen Injinir Malaysia (IEM) dikena mutarka penanggul bekaul pengawa ngaga jalai alun ba endur tanah kerapa.
Menteri Perengka Pengangkut Sarawak, Datuk Lee Kim Shin madah, nyentuk ke diatu perintah nengeri bedau bisi chara ke manah dikena mutarka pekara nya.
“Nyentuk diatu, kitai agi bedau mutarka penanggul injinir tanah kerapa. Kitai bedau ulih mutarka penanggul tu dikena kitai bejalaika pengawa ngaga jalai alun ba endur tanah kerapa. Di Sarawak kitai mayuh kandang endur tanah kerapa.” ku iya.
Lee madah munyi nya lebuh bejadi opis baru IEM pampang Miri ba tingkat dua Soon Hup Tower kemari.
Iya madah, pansik udah dipejalaika Opis Kereja Raya (JKR) maya iya mangku pengawa Menteri Muda Pemansang Infrastruktur enggau komunikasyen.
Perintah patut nyendiaka belanja dikena ba tuju pansik tu laban nyentuk diatu apin diputar penanggul nya.
Lee ke mega Kaban Kunsil Nengeri (ADUN) Senadin minta kerejasama IEM ngangkatka pengandal nembiak ba bidang Sains enggau Injinir.
Lee meratika pengandal rebak biak ba bidang tu majak kurang lalu nya ngirauka ati.
Enti pekara tu enda diputar, Sarawak dipelaba tau kurang injinir ke landik di nengeri tu kelebih agi dikena ba pemansang nengeri tu.
“Nuan ulih ngatur licha di sekula kelebih agi ungkup nembiak Form 5 enggau Form 6 ngambika ulih ngangkat pengerindu sida dalam bidang injinir,” ku iya nerang.
Lee mega madah, injinir ngembuan peluang bidang ke besai disedia ba kolej ti begunaka pengelandik enggau universiti.
Chunto bidang baka injinir sivil, mekanikal, kimia, elektronik, petroleum enggau material.
Kaban IEM ulih nyadi model ngagai nembiak nengah bekunsi pemujur enggau bantu sida dalam bidang tu.
Berebak enggau nya, indu EIM mega ngembuan pangku pengawa ke beguna dikena ngangkatka IEM Miri engagu bekunsi peneleba sereta pengelandik nengah licha, kelas nyengkaum aktiviti ke bukai.
Dulu agi ari tu, Chairman IEM Miri Dr Lau Hieng Ho madah, IEM Miri udah ditumbuhka 20 taun ke udah lalu pampang ke 12 di Malaysia.
Bisi 500 iku kaban ari Miri, Lawas, Limbang enggau menua bukai ari Brunei Darussalam ba IEM tu.
IEM bebendar deka ngiga begunan kediri lalu benung ngiga belanja nengah bemacham aktiviti ke diatur baka belanda injinir, pengerami makai malam pengasih, aum antarabangsa, woksyop enggau seminar.
Sama bisi datai iya nya Menteri Muda Dagang Temuai, Seni enggau Main Asal Datuk Sebastian Ting, Datuk Bandar Adam Yii sereta Sapit Presiden IEM Ong Ching Loon.