MIRI: Kaban Parlimen Miri ke mega Ketuai Pampang PKR Miri, Dr Micheal Teo madah, Kepala Menteri Sarawak Datuk Patinggi Abang Johari Tun Openg majak ‘terdesak’ lebuh iya deka nagang menteri perintah besai datai ngagai Sarawak enti ukai ba pengawa kereja rasmi opis menteri nya.
Ba siti penerang ti dikeluarka kemari, Dr Teo nimbal ngagai ripot ba mua berita The Sunday Post madah atur nya agenda politik Gabungan Parti Sarawak (GPS) lalu ukai ngetanka guna rayat enggau nengeri tu.
Dr Teo madah agi, pengawa enggau juluk ke dikena GPS nyengkaum nguji deka nyekat pengawa numbuhka Kaunsil Ngatur Komuniti Genturung Pendiau Perintah Besai (MPKKP) di nengeri tu, nyata bendar bebida enggau penegap runding dulu GPS lebuh ke madah sedia deka bekerejasama enggau Perintah Besai pengudah Barisan Nasional (BN) alah ngagai Pakatan Harapan (PH) maya Pengawa Bepilih Besai (PRU) ke suba.
“GPS diatu nguji deka nagang peranak genturung pendiau ari numbuhka MPKKP ba kandang menua sida, taja kebendar nya dikena ngenyemelaka program ngangkatmanah komuniti baka insurans pengerai enda bebayar enggau projek nyeliahka penyakit riman sereta ke bukai ti udah dipejalai enggau benung diperambu,” ku iya.
Iya madah kebendar ba belakang undang-undang Sarawak ke bisi diatu, rayat Sarawak patut diberi pemaik ari program Perintah Besai.
“Enti rayat Sarawak enggai ngambi bagi, sida semampai ulih mantah nya tang sida mesti diberi peluang betemu enggau mendingka pekara ti diperambu (ari Opis Menteri ba renggat Perintah Besai) ungkup sida,” ku iya.
Abang Johari, ke mega Chairman GPS, kena Hari Enam tu tadi, madah perintah nengeri seruran ngelaluka penatai menteri perintah besai ke Sarawak atas tanggungpengawa rasmi enggau ke bukai.
Taja pia, ku iya, enti tuju penatai sida tau ngenataika provokasi tauka bisi juluk ke bebida ari tuju asal (pengawa opis menteri) sida, nyadi perintah nengeri enda kakang ati deka nagang sida datai ke Sarawak.
Bejaku ba siti aum media di Kuching pengudah pengerami nutup Konvensyen Gabungan Parti Sarawak (GPS) keterubah di Palan Konvensyen Borneo (BCCK), Abang Johari nambah penegap runding perintah nengeri nyata bendar iya nya semina nagang individu ke udah bisi rikod.