Anda di sini

GPS meseti menang ba PRN Ke-12: Abang Johari

Advertisement
 Abang Johari lebuh bejaku nangguhka konvensyen GPS, kemari.
MESETI KERING: Abang Johari lebuh bejaku nangguhka konvensyen GPS, kemari.

KUCHING: Gabungan Parti Sarawak (GPS) enda tau enda menang ba Pengawa Bepilih Nengeri Ke-12 (PRN12), dikena nentuka agenda besai nengeri ulih dipejalaika.

Kepala Menteri ti mega Chairman GPS, Datuk Patinggi Abang Johari Tun Openg madahka nengeri sereta rayat mesti ngetanka hak, nya kebuah enda tau enda menang ba pengawa bepilih ti deka datai.

“Kemaya pengawa bepilih aku enda nemu. Tang kitai mesti besedia ngetanka hak enggau nengeri Sarawak tu.

“Tu pekara ti dikearapka ba kitai, utai ti dikearapka Allahyarham Tok Nan. Enti kitai sayauka Adenan (Allahyarham Pehin Sri Adenan Satem), sayauka nengeri Sarawak, sayauka pemesai kitai, kitai enda tau enda gawa enggau bendar dikena ngetanka nengeri Sarawak sebedau dikuasa orang bukai.

“Pengawa bepilih tu (PRN) amat beguna ba kitai, laban kitai bisi agenda ti pemadu besai. Aku enggai nyebut dulu (nama agenda nya) tang nya amat besai.

“Lalu kitai engka nengeri ti pemadu kering tauka tegap di Malaysia. Engka menua bepanggai ba kitai tang kitai enda amu, enti kitai tegap sereta kering kitai kunsi enggau orang, tang mesti menang ba PRN, anang alah laban ‘David Copperfield’,” ku iya.

Abang Johari ti mega Presiden Parti Pesaka Bumiputera Bersatu (PBB) mansutka pekara nya ba pengerami nangguhka Konvensyen GPS ti diatur ba BCCK ditu, kemari.

Nandu pekara nya baru iya madahka nengeri bisi agenda besai ari baruh GPS sereta nama ke dikembuan Sarawak deka nyadi siti nengeri ti dalam pemaik enggau pengelantang sereta ekonomi ti tegap.

Kelimpah ari nya lebuh dalam aum pengarang berita pengudah nangguh konvensyen nya, Abang Johari ditanya nama agenda besai GPS, iya madahka, dibantaika ila.

“Aku deka madah (agenda) nya udah pengawa bepilih, tang aku enda nemu kemaya bepilih. Timpuh penggal (DUN) ke sekali tu deka abis ba bulan April 2021.

“Taja pia kitai empat komponen parti GPS, kitai tetap besedia, seruran besedia,” ku iya.

Sama bisi datai Sapit Kepala Menteri ti mega Sapit Kepala Menteri ti mega nyadi Chairman Komiti Besai Konvensyen GPS Datuk Amar Douglas Uggah Embas, Sapit Kepala Menteri Datuk Amar Awang Tengah Ali Hassan, Presiden Parti Rakyat Sarawak Tan Sri Datuk Amar James Jemut Masing, Menteri Kaunsil Kandang Menua enggau Pengawa Berumah ti mega Presiden Parti Rakyat Bersatu Sarawak Dato Sri Dr. Sim Kui Hian enggau Presiden Parti Demokratik Progresif Datuk Seri Tiong King Sing sereta ke bukai.

  • oleh
  • Advertisement