SIBU: Penerebai bilun ari Sibu terus ke Brunei meri pemaik ngagai nengeri tu, lalu projek ngaga jalai alun ngagai Sibu-Kapit diperambuka deka tembu taun baru.
Menteri Dagang Temuai, Seni, Main Asal, Nembiak Lumba enggau Main, Datuk Abdul Karim Rahman Hamzah madah Sibu nyadi pintu penama baru Bandar Seri Begawan enggau penerebai bilun enam kali seminggu ti dipejalaika Royal Brunei Airlines (RBA).
“Aku ngarapka penerebai bilun tu ulih meri pemaik ngagai komiti kandang menua Sibu laban pengawa dagang temuai tu bekaul enggau semua sektor,” ku iya bejaku ba Pengawa Nyambut Penatai Bilun RBA Keterubah ke Sibu di Airport Sibu ditu ensana.
Sebedau nya, Abdul Karim mega madah, iya andal ke pengawa begulai entara RBA dan Sarawak deka nempa siti pemujur ti ulih nyulutka nama Sibu.
Iya mega madah RBA bisi enam buah palan penerebai bilun di China sereta lebih ari 30 buah palan di serata dunya.
Penerebai keterubah bilun RBA ke Sibu terengkah ba padang bilun menua tu urung pukul 2.35 lemai ensana.
Bilun nya ngundan 65 iku mensia nyengkaum bala raban bilun Royal Brunei nya empu.
Ba pengawa nya, bisi mega penatai Sapit Presiden Dagang RBA Ng Ai-Ling lalu penatai disambut Abdul Karim, Sekretari Mendam Opis Dagang Temuai, Seni, Main Asal, Nembiak Lumba enggau Main, Hii Chang Kee enggau Ketuai Eksekutif Dagang Temuai (STB) Sharzede Datu Salleh Askor.
Ai-Ling madahka diri temegah sereta gaga ati laban RBA nyadi kompeni penerebai bilun entara menua keterubah ke Sibu.
Iya mega madah RBA udah mai sereta mantaika Sibu nyadi palan keterubah ba rengat tu ti ulih ngaul semua sitak kandang menua ba pulau Borneo.
“Sibu ukai semina nerima pemaik ari tu aja, tang mega ulih nyungkak penatai pemisi ba pengawa dagang ari menua bukai baka China, Jepun, United Kingdom enggau Australia,” ku iya.
Kelimpah ari nya, Konsulat Jeneral Brunei Darussalam di Kuching Awang Mohammad Kamaluddin enggau Sapit Residen Bagi Menua Sibu Wong Hee Sieng mega bisi datai ngulu pengawa tu.
Nitihka penerang raban RBA, penerebai bilun pulai mansang ari Bandar Seri Begawan ke Sibu udah belabuh dipejalai ensana ngena bilun baru ATR 72-600 ti diatur Malindo Air.
Tikit bilun tu ulih dibeli ari semua raban dagang temuai tauka nengah opis dagang RBA enggau ba laman website www.flyrb.com.