Anda di sini

Ngurangka duit jali rumah panjai ngenusahka peranak di menua pesisir

Advertisement
DR PENGUANG
DR PENGUANG

MIRI: Pengawa perintah besai ti ngurangka duit jali rumah panjai dipeda lebih ngagai tuju politik ti deka ngenusahka perintah nengeri ti enda berundingka pekara nya tau ngenusahka rayat di menua pesisir.

Menteri Muda Kaunsil Kandang Menua ke mega Kaban Kunsil Nengeri Marudi Datu Dr Penguang Manggil madah, Opis Menteri Pengawa Berumah enggau Kaunsil Kandang Menua enggai nyadi enda ngurangka penyampau duit jali rumah panjai laban belanja diberi ari perintah besai dikurang.

Sebedau Pengawa Beilih Besai (PRU) Ke-14 kena 9 Mei 2018, Sepenyampau RM50 juta udah dikemendarka perintah besai ti mungkur 82 rumah panjai di nengeri tu, lalu ti dikemeratka iya nya rumah panjai ti dituntung penusah baka penusah angus enggau penusah tanah tusur tauka penusah ngenyit nyadi.

Taja pia, Pakatan Harapan (PH) ke megai perintah besai pengudah ngalahka Barisan Nasional (BN) ba PRU nya nyerenih baru sereta ngurangkan agih belanja lalu perambu pemansang perintah sebedau tu enggau kebuah enda chukup duit sepengudah duit turu menua disalahguna sereta salah dipejalaika perintah ke sebedau nya (BN).

“Ungkup taun 2020, semina RM10 juta udah dikemendarka dalam bajet ungkup skim jali rumah panjai lalu Opis Pemansang Pengawa Berumah (HDC) Sarawak enggai enda pan minta ari perintah nengeri dikena nambahka penyampau nya,”ku iya.

Menteri Pengawa Berumah enggau Kunsil Kandang Menua, Dato Sri Dr Sim Kui Hian kena 11 November madah ngagai Kunsil Nengeri (DUN) ke alai duit jali maksimum RM30,000 deka dikurang ngagai RM20,000 ungkup tetiap rumah panjai berengkah taun baru ila.

Perintah besai sebedau tu meri Sarawak RM50 juta ari penyampau RM70 juta ke diungkup dalam Bajet 2016 ungkup duit jali dikena berumah ti nadai bungai ari nengah Bank Simpanan Nasional (BSN) dikena ngaga rumah panjai.

Duit Jali maksimum taun nya ungkup tetiap unit rumah panjai iya nya, RM50,000 (ari RM10,000) pengudah ex-Menteri Besai Datuk Seri Najib Razak ba taun 2015 ngemendarka duit jali nya sepengudah mendingka peminta Kaban Parlimen bansa Dayak ngambi nambahka duit jali dikena berumah ngambika dikena ngaga rumah panjai di nengeri tu.

Rumah Collin Sait, rumah panjai 23 pintu di Bakong dalam sitak Kunsil Nengeri Marudi, ti keterubah endar ari baruh Skim Rumah Panjai Mesra Rakyat ti digaga HDC ari baruh Opis Menteri Pengawa Berumah enggau Kaunsil Kandang Menua.

Projek tu berengkah dalam taun 2015 lalu peranak pindah ngagai rumah panjai baru sida kena bulan Mac 2017, berindik ari penembu projek RM2.64 juta nengah HDC  kunteriktor ke dipilih, Crest Reality Sdn Bhd.

Nya mungkur ungkus sepenyampau RM115,768 tetiap pintu, tang sepertiga ari rega nya (RM38,589) disubsidi perintah besai maya ny, tang laluh RM77,179 ditanggung ruang bilik nengah penyampau bayar RM327.10 sebulan ungkup timpuh dibayar pulai baru pengelama 25 tahun.

Advertisement