KUCHING: Ketuai komuniti Iban Pelilih Kuching meri puji ti besai ngagai Kepala Menteri Datuk Patinggi Abang Johari Tun Openg ti terus komited bejalaika tanggungpengawa ngagai Komiti Pemansang enggau Pengelikun Genturung Pendiau (JKKK).
Nangkanka nya, iya udah ngungkupka belanja RM100 juta dikena mayar elawin JKKK nya.
Bala ketuai raban bansa, Temenggung Dato Bernard Aggan madah ba siti penerang ditu kena Hari Lima tu tadi nyemaka Abang Johari udah mandangka pemanah iya ti nyadi ketuai semua rayat Sarawak.
Iya madah pekara tu dikena ngurang penusah ti ditapi sida pengudah Menteri Kereja Raya Baru Bian madahka perintah besai nadai agi meri mayar bantu RM500 elawin ninting bulan ungkup ketuai raban bansa berengkah taun baru ila.
Bantu elawin RM900 ungkup Tuai Rumah, Ketuai Genturung Pendiau enggau Kapitan ke mega pengari JKKK deka dibayar penuh ari baruh perintah nengeri.
“Berebak enggau nya, kami pechaya organisasyen JKKK agi mengkang efektif sereta relevan bejalaika tanggungpengawa ngagai rayat.
“Kami mantah pengawa numbuhka Kaunsil Ngatur Komuniti Genturung Pendiau Perintah Besai (MPKKP) ke alai komiti pengatur komuniti genturung pendiau perintah besai nitihka kedeka perintah PH.
“Penumbuh nya ukai semina tau nyarutka rayat tang mega ulih mambarka penyerakup sida,” ku iya.
Aggan minta bala pengari JKKK ngambika ngubah baru komiti nya dikena ngenegapka sida.
“Kitai patut terus tegap nyukung ari belakang perintah nengeri ti pegai Gabungan Parti Sarawak (GPS) ngambi mayuh agi pemansang ulih dibai ngagai nengeri tu.
“Kitai mega patut nyukung penuh dikena nentuka perintah nengeri terus tegap ti betuaika Kepala Menteri Sarawak dalam ngetanka semua hak enggau pengelantang sereta penyerakup raban bansa,” ku iya.