SIBU: Dikena ngemeran sereta ngetanka adat enggau main asal raban bansa Iban ba nengeri tu, Gerempung Main Asal Dayak Sibu (KEMADA) udah mujur ditumbuh kena bulan Julai taun nyin kemari.
Chairman KEMADA Jackery Chukan madah, gerempung tu udah bulih pemendar ari Opis Ngerejista Gerempung (ROS) enggau mujur.
“Diatu KEMADA ngembuan lebih ari 30 iku raban lalu kami suah diundang datai ngagai program perintah enggau opis company luar, baik ke ba luar Sarawak tauka luar menua,” ku iya lebuh berandau enggau pengarang berita kemari.
Jackery madahka tuju KEMADA tu ditumbuhka kena ngetanka main asal kitai Iban tauka Dayak, ambika chunto baka main Gendang Pampat ti majak enda dikelala tauka ditemu bala nembiak rebak kemaya hari tu.
“KEMADA tu nyadika pelasar dikena kami mantaika main adat asal kitai ngambika enda lenyau laban arus pemansang dunya digital baka ke diatu nyentukka ila,” ku jaku tangkan iya.
Nitihka ku Jackery, KEMADA naka ke diatu udah ngatur tauka ngaga kelas belajar main Sape, Ngajat enggau Gendang Pampat.
“Ngagai bala mayuh ti deka nyadi raban gerempung tu tauka ngembuan pengerindu ke main adat asal Iban/Dayak, kita endang diundang sereta dikangau datai ngambi neguh sereta ngetanka adat enggau main asal kitai tu,” ku iya baru nampung jaku.
Barang sapa ti ka betanya enggau lebih silik agi bekaul enggau KEMADA tu, ulih betelefon ngagai lumur Jackery empu iya nya 019-8390839.