Anda di sini

GPS deka nyadi lebih tegap enti beserakup - Masing

Advertisement
Masing
Masing

KUCHING: Penyerakup, kerejasama sereta nadai beperagam enda manah beguna amat dikena nentuka Gabungan Parti Sarawak (GPS) terus nyadi gempung parti entap sereta tegap di nengeri tu.

Sapit Kepala Menteri ti mega Presiden Parti Rakyat Sarawak (PRS) Tan Sri Datuk Amar James Jemut Masing madah, laban enti gempung GPS beserakup sida deka nyadi lebih tegap tang enti beserara deka pambar.

Iya madahka GPS gempung parti ti asal ari Sarawak iya nya PRS, Parti Pesaka Bumiputera Bersatu (PBB), Parti Rakyat Bersatu Sarawak (SUPP) enggau Parti Demokratrik Progresif (PDP), lalu komponen tu patut tegap ngambika datai ba penyangkai enggau likun sereta mujur.

"GPS disema baka sebuah bas ke alai Kepala Menteri Datuk Patinggi Abang Johari nyadi deriba, lalu semua kaban GPS nya penumpang bas ti betuaika Abang Johari. Nyadi penumpang patut meri sukung ngagai deriba iya nya Kepala Menteri.

"Udah tentu mega jalai ke ditengah nya betiku - tiku, tang kitai patut terus arapka deriba kitai, ngambika ulih mai kitai ngagai endur ke dituju enggau likun, iya nya ngetan enggau nyaga hak kitai orang Sarawak," ku iya.

Masing ti mega Kaban Kunsil Nengeri (ADUN) Baleh madahka pekara nya lebuh ti bejaku ba pengerami bejadika  Konvensyen GPS 2019 ti dipenyadika Kepala Menteri Datuk Patinggi Abang Johari Tun Openg ti diatur ba BCCK ditu, seharitu. 

Berebak enggau tu Masing mega ngarapka dalam GPS nadai munsuh dalam pua sereta patut bejimat enggau orang ke baka nya laban enda nemu sapa orang nya.

"Munsuh dalam pua nya, iya baka kitai, iya bejaku baka kitai, nya kebuah orang nya ulih ngachau," ku iya.

Sama bisi ngulu pengerami nya Presiden Parti Sa'Ati Rakyat Sarawak Dato Sri Dr Sim Kui Hian sereta bala ketuai GPS enggau urung 5,000 iku pengari ari serata nengeri.

  • oleh
  • Advertisement