BARAM: Pelajar di nengeri tu nyadi tanggungpengawa semua enda ngira perintah ke megai kuasa, nya alai pekara nya enda patut dipolitik, pia ku Kaban Kunsil Nengeri (ADUN) Telang Usan Dennis Ngau.
Lebuh ti dipinta meri penemu bekaul berita selebubu tu madahka pengari rayat ari Gabungan Parti Sarawak (GPS) ti ditagang ngulu program sekula di Sarawak, Dennis madahka pengawa ari sekeda orang ti deka nagang pengari rayat GPS datai ngulu pengerami ba sekula tu deka mai pengerusak ngagai nembiak di menua pesisir di Sarawak jemah ila laban lebih ari 60 taun sekula udah ditumbuh, atur ke bejimat ngatur belanja ti dipejalaika perintah ke sebedau tu dikena ngintu institusyen sekula di menua tu baka ke dipeda sehari tu.
“Nya alai kami endang ngelaluka bantu semua parti ti enda ngira penemu politik sida ngambika sama bebendar ngemansangka infrastruktur enggau perengkaguna sekula sereta ngangkatka penyulut pelajar nembiak sekula. Nya alai, ukai pekara ti manah sereta tuai runding enti perintah besai ke baru nagang penatai sida ngulu program di sekula ketegal diatu sida megai perintah, lalu malas dendam ngrna peakra nya ngagai parti penyakal di meua tu.
“Sida (Pakatan Harapan) udah salah lebuh ti berunding baka nya lalu ngaga perintah menua ke sebedau tu baka nya.
“Kebendar nama pekara ti patut digaga perintah besai iya nya ngelalu sereta bebasaka pengeransing perintah GPS ti bebendar nentuka sekula di kandang menua pesisir ba Sarawak baka di Telang Usan ngatur sereta ngemeranka bemacham aktiviti ke pemaik nembiak sekula.
“Entara agih belanja aku ti pemadu besai nengah geran Projek Mit Menua Pesisir (MRP) kenyau ari taun 2011 iya nya diberi ke Gerempung Apai Indai enggau Pengajar (PIBG) sekula ti udah begunaka sida ngatur pengawa beripai nyeruri kelas ba sekula, kuarters pengajar, nyendiaka palan lumba enggau main di sekula, nyeruri begunan buding sekula, balai makai, agu, palan endur ngengkahka tangki ai, palan pejalai kaki ti bisi perabung, ngatur program lumba enggau main di sekula, pengerami ngintu sereta meri basa ngagai penyulut nembiak, duit turu pengelantang pendiau pengajar, duit belanja dikena mai nembiak lebuh ngarika bagi menua dalam pekit lumba enggau main, mayar yuran nembiak sekula ari ruang bilik ti kurang penatai pemisi enggau mayuh agi. Nyema aku enda meri MRP ngagai sekula, uji perundingka pemerinsa ti ditapi nembiak enggau bala pengajar. Semina mimit tauka nadai agih belanja ari Opis Menteri Pelajar Malaysia,” ku Dennis lebuh ti bejadi pengerani nutup Pekit Lumba enggau Main Ninting Taun Sekula Primari (SK) Long Sobengkena malam Hari Empat tu tadi.
Dennis nyemetak madahka bisi mega ba sekeda program raban PIBG enggau sekula minta bantu nyendiaka belanja dikena ngaga sukut ‘Highly Immersive Program’ ke pemaik pelajar dalam Jaku English lalu bansal nya beungkus RM10,000.
“Aku udah setuju lalu deka ngemendarka agih belanja ungkup pengawa nya. Bisi kini tempat bukai endur sekula minta bantu ari sukut mata duit? Nadai, nyauka nadai pilih bukai. Nya mih sida semina ngarapka pengari rayat GPS.
“Berindik ari tu mih, ti nyadi kebuah Kepala Menteri Datuk Patinggi Abang Johari Tun Openg nambah sereta nyendiaka geran MRP ungkup pengari rayat sereta Kaban Parlimen GPS dikena nangkup peminta peranak di sitak pegai sida.
“Nyema PH keran deka neruska pelin sida nagang kami, pekara ti sama mega patut digaga ba sekula di kandang mengeri mega. Anang semina ngaga atur nya ba sekula menua pesisir laban ti ditating penusah ila iya nya bala anak kitai. Anang ngaul bala anak kitai tu enggau main politik kita ti enda manah tu,” ku iya nyemetak.
Ku Dennis pekara tu ti ngasuh iya terunding kebuah PH numbuhka MPKK ba rumah panjai di Sarawak laban deka meri bantu mata duit ngagai genturung pendiau.
“Nyema amai baka nya, aku ngarapka perintah PH mega meri bantu ngagai PIBG laban PIBG tu ari baruh pegai sekula lalu sekula ari baruh tanggungpengawa perintah besai,” ku iya madah seraya nambah nembiak ti enda nemu utai enda patut dibai dalam main politik bansa tu.