KUCHING: Sapit Kepala Menteri Datuk Amar Douglas Uggah Embas nyambut manah berita ngaga dua Padang Bilun Alai Bekejang enggau Sangkai ti Pandak (STOLport).
Dua STOLport nya, iya nya STOLport Bebuling, Spaoh di Betong enggau STOLport Bukit Mabong,Tunoh di Kapit.
Berita nya dipadahka Sapit Kepala Menteri ke mega Menteri Infrastruktur enggau Pemansang Penyangkai Kapal Tan Sri Datuk Amar James Masing, ti m adahka deka ditinda ba suku keterubah taun baru.
Masing madah munyi nya ba Aum Kunsil Nengeri (DUN) kena Hari Tiga tu tadi nengah simpul jurai opis menteri iya.
Ku iya, kededua projek nya deka dipelanja perintah nengeri lalu diatu benung ba renggat ngelangkar.
Ku Masing, STOLport Bebuling dianggarka beungkus RM108.3 juta lalu Bukit Mabong dianggarka beungkus RM193.1 juta.
Iya madah, kelimpah ari dua STOLport nya,perintah nengeri mega udah ngemendarka pengawa ngaga Padang Bilun baru Lawas ke beungkus RM480 juta.
“Nangkanka nya ungkup padang bilun baru Mukah,nya deka dipelanja perintah besai ke sepenyampau RM495.3 juta, ke diatu udah tembu digaga 60.8 peratus, Ialu disadang tembu digaga nyerumba bulan September 2020,”ku Masing.
Berebak enggau nya, Uggah madahka berita ti dibantaika Masing kelebih agi sentang STOLport Bebuling, mandangka rikod siku pemesai khas ba Opis Menteri Kereja Raya perintah besai enggau ke bukai semina “berita palesu”.
STOLport Bebuling di Spaoh dalam sitak ke dipegai Uggah, iya nya Bukit Saban.
“Baka selama,pemesai khas nya sekali agi mai berita palesu dikena ngamahka nama perintah Gabungan Parti Sarawak (GPS) enggau bala menteri nya.
“Iya semina bepanggai ba pemula dikena matak perati rayat,” ku iya.
Ku Uggah, nitihka padah pemesai khas nya,Bebuling nadai ngasaika nenama kemaya hari tu ketegal pemendar ari perintah besai enggau isu melanja nya.
“Taja pia pengamat tebantai tang nemu enda iya sentang nya,” ku Uggah.
Ngenang baru pasal STOLport Bebuling, Uggah ke mega Menteri Betanam Betupi Moden, Tanah Adat enggau Pemansang Kandang Menua madah, kededua Spoh di Betong enggau Sungai Tunoh di Kapit, dua kandang agropolitan baru ti beguna amat.
“Palan nya begunaka penyambung nengah langit nengah servis perengka pengangkut langit khas dikena nyambung sida ngagai padang bilun ke besai agi ngambika ulih ngangkut produk ladang enggau dagang temuai,” ku iya.
Sarawak ku Uggah,diatu benung nyikap diri nyadi pengeluar enggau pengeksport pemakai beresi nyerumba taun 2030 baka ti diperagam Kepala Menteri, Datuk Patinggi Abang Johari Tun Openg.
Ku Uggah, pansik pengulih STOLport Bebuling dipejalaika dalam bulan November taun siti nyin tadi lalu pansik nya tembu digaga dalam bulan April taun tu, lalu udah dikemendarka Unit Perambu Nengeri enggau Opis Menteri Infrastruktur enggau Pemansang Penyangkai Kapal.
“Renggat ngelangkar udah manggai 90 peratus,” ku iya seraya madahka nya dipelabaka tembu digaga dalam timpuh tiga taun.
“Enti udah tembu ila, nya ulih alai bilun bansa Cessna 208 enggau Twin Otters sangkai tauka bekejang.
“Kami optimistik, ba awak ke semak tu tetimbalka kriteria Kaunsil Penerebai Malaysia (MAVCOM) ngambika ngaku nyadi jalai baru Servis Langit Menua Pesisir (RAS),” ku iya.