KUCHING: Siku jelu jugam udah diambi polis begulai enggau Sarawak Forestry Corporation dalam urung 5.30 lemai kena ke 13 November ba sebuah rumah panjai di Betong.
Komander Polis Marin Pelilih Lima ACP Shamsol Kassim ba penerang kemari, madahka jugam nya diinang nyadi jelu tupi siku peranak rumah panjai nya.
“Tang, nadai sapa ngaku ngempu jugam nya maya operasyen dipejalaika,” ku Shamsol seraya madahka nadai sesapa ke ditan maya operasyen nya.
Iya nambah beruang nya ditan ari baruh Seksyen 48(1) Ordinan Nyaga Jelu Siga 1998 ke alai munuh, nginang, nyual tauka meli jelu nya tauka derivatif ditagang nengah undang - undang slalu enti ditemu salah, orang ke ngereja nya deka dijil setaun sereta ditinggang ukum RM10,000 Jugam nya diserah ngagai SFC ngambika atur ti patut dipejalaika.
Berebak enggau nya, dua iku jugam udah diselamat SFC bedau lama, ke alai keterubah ba genturung pendiau di Demak Laut kena ke 25 September lalu kedua diselamat ba rumah kebun enda jauh ari Kampung Rasau, Serian kena ke 27 September.
Taja pan kededua pengempu jelu nya bisi permit nginang jugam nya nyadi jelu tupi, tang sida udah ngelanggar sekeda pinta enggau penetap dalam permit nya. Kedua iku jugam nya udah dianjung ngagai Palan Ngintu Jelu Siga Matang lalu deka diperesa sereta diintu enggau manah.
Barang sapa ke bisi penenerang sentang pengawa ke sebaka tau betelefon ngagai SFC hotlines ba lumur 016-8565564/019-8859996 (Kuching), 019-8883561 (Sibu), 019-8223449/019-8332737 (Bintulu) enggau 019-8290994/018-9799778 (Miri).