KUCHING: Pengari rayat enggau raban pengawa bepilih Gabungan Parti Sarawak (GPS) mesti nyikap diri nyilat semua ‘serang’ ari Pakatan Harapan (PH) dikena ngetanka nengeri tu ba Pengawa Bepilih Nengeri Ke-12 (PRN12).
Kepala Menteri Datuk Patinggi Abang Johari Tun Openg madah,PH Sarawak diatu benung bagas ‘nyerang’ lalu ngaga peragam negatif nyengkaum bejaika sesiku ti nyadika puku dikena menang ba PRN-12.
Ku Chairman GPS nya nyemetak, baka ke nyadi ba Aum Kunsil Nengeri Ke-18 ke baru tembu ensanus, bemacham peragam negatif sereta bejaika sesiku digaga PH Sarawak ngagai iya.
“Sida ngaitka Bajet Sarawak 2020 enggau 1MDB nyengaum bejaika aku empu, tang aku meri pengaga ati ngagai kita semua laban udah mujur ngemuntanka ulah sida nyentuk ke sida teduduk.
“Nya alai utai ke deka dipadahka aku ditu iya nya,kitai mesti nyikap diri ari semua taktik ti dikena PH nyerang kitai.
“Sida (PH) deka megai kitai (Sarawak), kitai ngelaban baru nyentuk ke sida pansut ari tu (nengeri tu),” ku iya lebuh bejaku ba Pengerami GPS Backbenchers Night di Hotel Grand Margherita Hotel malam ensanus.
Ba pengerami nya, Abang Johari ngelalau semua pengari rayat enggau raban pengawa bepilih GPS nyaga pengerai diri enggau manah.
“Kitai deka ‘beperang’ (PRN) nya kebuah anang enda nyaga pengerai diri,” ku iya.
Kelimpah ari nya, iya mega ngenataika pengaga ati ngagai pengari rayat GPS enggau staf DUN ti udah nentuka aum ke sekali tu lanchar sereta mujur.
Ngena pwlung nya mega iya ngelalau pengereja pengawa perintah nengeri bejalaika tanggungpengawa enggau manah ke pemaik semua rayat.
Ku iya, nya beguna amat dikena nentuka tetiap perambu enggau enggau projek ti digaga perintah nengeri lanchar sereta mujur.
“Baka nyukat tanah, staf Opis Tanah enggau Survei (JTS) patut proaktif b ejalaika pengawa nyukat tanah rayat ngambika surat tanah ulih dikeluarka enggau lengkas.
“Baka nya mega enggau projek bekal ai menua pesisir, tentuka kereja kita din digaga enggau manah laban nya enda patut diputarka lengkas,” tambah iya.
Dulu ari nya, Chairman Kelab Penyokong GPS Paulus Palu Gumbang madah, semua pengari rayat GPS bediri tegap ari baruh iring Kepala Menteri.
Kaban Kunsil Nengeri (ADUN) Batu Danau nya nyemetak madah, GPS deka betapi enggau gaya ke bebida maya PRN-12 ila enti dibandingka enggau pengawa bepilih ke sebedau tu.
“Kami beserakup ari baruh iring nuan (Abang Johari), nya alai aram mih kitai nambahka pengeran enggau kerejasama ngambika ulih meri servis ke pemadu manah ngagai rayat.
“Fokus ngagai kandang menua pesisir laban nya deka nya palan beperang maya PRN ila,” ku iya.
Sama bisi datai bini Kepala Menteri Datuk Amar Juma’ani Tuanku Bujang, Speaker DUN Datuk Amar Mohd Asfia Awang Nassar, Sapit Kepala Menteri Datuk Amar Douglas Uggah Embas, Sapit Kepala Menteri Tan Sri Datuk Amar Dr James Masing Jemut, raban menteri kabinet enggau menteri muda, ADUN sereta bala temuai ti dipebasa ke bukai.