SIBU: Sarawak diatu benung bejalaika pengawa ti deka munaska penyakit Malaria bepun ari taun 2020, ku Kepala Menteri Datuk Patinggi Abang Johari Tun Openg.
Nitihka penemu iya, Sarawak endang bisi penanggul besereta enggau pemujur ba pengawa munaska penyakit berampit Malaria tu ba sekeda kandang menua.
“Ari pengelandik enggau pemintar raban Opis Pengerai Sarawak (JKS), kitai udah bisi chara dikena mutarka penanggul penyakit tu ari ke majak nyadi.
“Tanggungpengawa besereta enggau sukung mensia mayuh nagang Malaria tu ngerekai mega endang amat beguna, nya alai raban JKS enda tau enda meri lalau ngagai sida kelebih agi ba menua pesisir.
“Perintah Nengeri begulai enggau Opis Pengerai Sarawak diatu benung besaup ngintu pengerai rayat ngambika pengidup sida manah ari ke udah.
Iya mega madahka perintah nengeri patut meri bantu enggau sukung ngagai pengawa tu dikena nyaga pengerai rayat Sarawak.
Berebak enggau nya, Abang Johari meri pengaga ati ngagai Universiti SEGi enggau BRTMA laban udah mai kongres nya ke Sibu lalu iya mega meri terima kasih ke penatai 700 iku orang ke ngembuan pelandik sereta bisi penemu pasal pengerai bisi enggau ngulu nya kemari.
“Ke diatu, kitai benung nuju pemujur ti deka munaska Malaria bepun ari taun 2020,” ku iya madah ba Program Bejadika ‘Belt And Road Tropical Medicine Alliance’ (BRTMA) - Malaysia International Congress On Tropical Medicine (BMICTM) ti bepalan ba sebuah hotel ditu, pagi kemari.
BRTMA ditumbuhka ba kandang menua Hainan, China ba taun 2018 suba, lalu University SEGi sekeda ari serakup nya ari 30 iti bengkah menua seluruh dunia.
Teks iya dibacha Menteri Pengawa Berumah ke mega Menteri Opis Kandang Menua Dato Sri Dr Sim Kui Hian lalu nyadi pengari Abang Johari bejadika program nya.
Ba pengawa nya, bisi mega Ketuai Pemesai Eksekutif Raban Company SEGi Sdn Bhd Hew Moi Lan, Sapit Canselor Universiti SEGi Profesor Dr Patrick Kee Peng Kong, Perunding Penyakit Berampit Opis Pengerai Menua Malaysia (KKM) Dr Suresh Kumar iya ke nyadi pengari Ketuai Direktor, pengari ari JKS Universiti Hainan Profesor Zhang Fan enggau Chairman Pengatur Pengawa BRTMA - BMICTM Profesor Dr Mohd Raili Suhaili.