KAPIT: Chairman Gerempung Apai Indai enggau Pengajar (PIBG) SMK Selirik,Tuai Rumah Naga Sulok meri puji ngagai sekula ti nudah ngangkatka kualiti akedemik enggau kurikulum nembiak sekula nyadi nyulut beberapa taun ke udah.
“Aku meri puji ngagai sekula ti udah ngangkatka tikas kualiti nembiak beberapa taun ke udah ari sukut akedemik enggau aktiviti kurikulum. Sekula udah tampak rita ari pemujur pemutus peresa ti nyulut ba PT3, SPM enggau STPM.Gred peresa sekula mega niki. Tu mih ke ngemegahka sekula enggau apai indai lebuh sida nganjung anak sekula ditu,” ku Tuai Rumah Naga.
“Pemujur tu asil kerejasama ari semua. Kualiti atur sekula ti dibetuaika prinsipal ke dinamik iya nya Jarit Jermit enggau bala pengajar, ari apai indai ti komited ba pelajar sekula anak sereta nembiak ti ransing ba pelajar sida.
Taja pia, kitai enda patut muai masa laban dia semampai bisi alai endur ngangkatka diri.
Teruska enggau bebendar nyapai juluk ati ngambika SMK Selirik ulih nyadi palan besai ti nyulut ba pelajar jemah ila,” ku iya madah maya pengerami ‘Nembiak Nyulut enggau Graduasyen Pra Universiti SMK Selidik ti diatur ba dewan sekula bedau lama udah.
Sama bisi datai ba pengerami tu iya nya Sapit Ketuai Sekula; Dewis Lidek, Dr Layang Ugek, Kareno Lambong entara sekeda bala pengajar, apai indai, enggau nembiak.
Syaiful Annuar ke ngari Pemesai Opis Pengajar Kapit, Ringgit Saut bejadi pengerami nya.
Iya meri puji ngagai sekula ti udah ngatur pengerami ninting taun nya. Iya madah pengerami tu beguna amat ba rintai kalenda sekula ti diatur ujung taun ke digulu bala pengajar, apai indai enggau nembiak dikena meri tanda basa sereta ngelala penyulut nembiak sepemanjai taun.
“Meri puji ngagai sida ke udah nyulut dalam akademik sereta kurikulum.
Pemujur nuan udah dikelala sekula lebuh nuan nerima setipikit tanda basa enggau perais nya.
Pengajar enggau apai indai nuan temegah ati enggau penyulut ke dijapai ketegal pengeransing besekula ngambika dikelala orang.
Pekara ti amat beguna maya nuan sekula, dikena nyapai pelajar holistik, iya nya ukai semina mujur ari sukut akedemik tang mega nyengkaum ba aktiviti kurikulum dikena nempa pemanah ulah enggau pengidup nuan.Pemanah ulah sereta discipline beguna amat dikena nentuka pengidup jemah ila.,” ku Syaiful nyemetak
Prinsipal Jarit Jermit mega bisi bejaku ba pengerami nya, madahka sekula nya udah bebendar bejalaika tanggungpengawa sida dikena mantu pelajar nembiak.
Iya madah kenyau ari pun taun tu, sekula bisi ngatur kelas belajar lemai ke alai nembiak ti pulai hari dipinta datai ke kelas tambah berengkah ari Hari Satu ngagai Hari Empat.
Nembiak ti diau ba buding deka belajar muak ke malam berengkah ari Hari Satu nyentuk Hari Lima.
Iya meri terima kasih ngagai komitmen bala pengajar ke udah ngaga kelas tambah sepengudah jam ngajar ba sekula ngambika ulih mantu nembiak dalam pelajar sida.