KUCHING: Lima kandang menua di Sarawak deka nyadi palan endur ngatur Festival Budayaw 2019 BIMP - EAGA (Brunei Darussalam Indonesia Malaysia Philippines East ASEAN Growth Area) ti berengkah ari 19 ngagai 23 November tu.
Menteri Dagang Temuai, Seni enggau Main Asal Datuk Abdul Karim Rahman Hamzah madah, BIMP-EAGA ngatur pengerami betukar main asal dua taun sekali, lalu taun tu Festival Budayaw ke-2 diatur di Malaysia.
Diinstitusyenka pengudah penambah ‘Socio-cultural and Education Pillar’ di BIMP-EAGA ba taun 2015, Festival Budayaw iya nya ‘signature event’ ti nyadi endur nempa kaul ti lebih rapit entara rayat Brunei Darussalam, Indonesia, Malaysia (Sabah, Sarawak enggau Wilayah Persekutuan Labuan) enggau Filipina (BIMP).
“BIMP-EAGA ngatur edisyen ke-2 pengerami dua taun sekali pengerami betukar main asal, Budayaw Festival ti diatur kena 19 ngagai 23 November tu ti berambaika leka jaku ‘Beauty In cultural Diversity’.
“Sekeda kandang endur kitai ditu (Kuching) nyadi palan alai ngatur iya nya Plaza Merdeka, Kort Lama, Pullman Kuching enggau Palan Konvensyen Borneo Kuching sereta di Dewan Suarah Kota Samarahan.
“Festival Budayaw 2019 deka ngempuruka 356 pengari ari menua BIMP enggau ‘BIMP-EAGA Development Partner’ Kandang Menua Utara Australia, ti nyereta ba sekeda pengerami ti mandangka mayuh bengkah ekspresyen kreatif pengemeran main asal enggau artis, tu mega dikena nambahka penemu sereta nempa penyayau ngagai lanskap, ‘life-scapes’ enggau aspirasyen rayat di menua tu,” ku iya.
Abdul Karim mansutka pekara nya dalam aum pen garang berita Festival Budayaw 2019 BIMP-EAGA ti diatur ba bilik aum Opis Menteri Dagang Temuai, Seni enggau Main Asal ba Begunan Baitulmakmur ditu, kemari.
Bisi 356 iku pengari nyangkaum 21 iku ari Brunei Darussalam, Indonesia (115), Malaysia (140) enggau Filipina bisi 80 pengari.
Ku Abdul Karim, tuju kerejasama BIMP-EAGA dikena nambahka pengawa dagang kelimpah ari nambahka pemeranak puku enggau nyungkak industri dagang temuai. “Nambahka nya siti agi tuju kerejasama ti nyata amat entara menua BIMP-EAGA iya nya main asal enggau seni.
Berengkah ari tu mih Festival Budayaw ditumbuhka.
“Baka ti dipadahka ngagai aku, Budayaw keterubah endar ditaur dua taun ke udah di Filipina lalu berebak enggau nya suba sida setuju Budayaw tu diatur di Kuching,’ ku iya ti mega Menteri Nembiak Lumba enggau Main.
Ku Abdul Karim, pengerami nutup Festival Budayaw 2019 kena 23 November dipelaba deka dipenyadika Kepala Menteri Datuk Patinggi Abang Johari Tun Openg, sereta dipelaba bisi digulu Menteri Pekara Ekonomi Malaysia Datuk Seri Mohamad Azmin Ali.
Penerang silik bekaul enggau Festival Budayaw 2019 BIMP-EAGA tau dipeda ba website rasmi (www.budayaw.com) enggau Facebook Budayaw Festival 2019 tauka betanya ngagai Nur Hanisah Untong (016-5752572), Nurul Atikal Reji (014-6920712) enggau Mereya Kaluk (017-8545987).