KUCHING: Sarawak benasit manah laban bisi Kepala Menteri Datuk Patinggi Abang Johari Tun Openg ti pintar ba pekara ekonomi ti ngujungka Perintah Nengeri merambu sereta ngaga pemansang ngambika maju manggai ba taun 2030, pia ku Sapit Kepala Menteri ,Datuk Amar Douglas Uggah Embas.
Ku iya, pengari rayat Pakatan Harapan (PH) dalam Kunsil Nengeri Sarawak papas ke Gabungan Parti Sarawak (GPS) ti ngembuan jalai pemansut dikena ngemansangka Sarawak ti dibantai dalam Bajet Sarawak 2020.
Iya nyaut tanya Kaban Kunsil Nengeri (ADUN) Kota Sentosa Chong Chieng Jen ti nanyaka jalai pemansut belanja nengeri ketegal nginjau RM13 bilion ari makit modal enggau peribit.
Chong ke mega Chairman PH Sarawak madah, chara nya deka ngeruga penuduk belanja nengeri laban beratika Bajet Sarawak 2020 nyendiaka urung RM9 bilion.
Uggah ke mega Menteri Wang Kedua lebuh nyimpul ju rai opis menterinya nyaut, pekara silik sentang Bajet deka diterangka Abang Johari nengah sesi nutup jurai lemai kemari.
Ku iya, penuduk belanja nengeri deka tegap agi enti kukuh PH ngamatka semaya Pengawa Bepilih Besai Ke-14.
“Tang nadai ngawa enti (PH) ngamatka semaya meri 20 peratus royalti (minyak enggau gis), 50 peratus (asil) cukai (digumpul di Sarawak).
“(PH) enda ngamatka semaya, nginsil projek sereta bebendar (ngulihka belanja dikena melanja projek di) Sarawak,nadai isu tu,” ku iya.
Ku Uggah baru, GPS bisi tanggungpengawa nentuka Sarawak maju manggai ba taun 2030 nengah komitmen meri pengelantang ngagai rayat menua tu.
“Kitai mega (bisi) Kepala Menteri ti bisi tanggungpengawa, bepegai ba polisi enggau prinsip,” ku iya.
Iya mega lalu mejah sereta madahka Menteri Wang, Lim Guang Eng kebendar iya mendingka jaku lalau ari Chong.
Lim ku iya, madahka Sarawak deka bankrap dalam timpuh tiga taun enti GPS terus megai nengeri tu.
“Nya mih penyanding penemu iya, nuan enda talukka Sarawak. Nuan papaska kami bisi pemisi ngemansangka Sarawak,” ku iya.
Sentang jaku tuduh ti madahka Bajet Sarawak 2020 enda realistik laban nadai belanja dikena ngaga sekeda projek pemansang, iya madahka jaku tuduh nya nadai pengamat.
“Ketegal sida kurang mereti ngaduka belanja ba sektor perintah lalu bakani Bajet Negeri dilangkar,” ku iya.
Berebak enggau nya, Chong ba aum media nerangka isu Lim ti m adahka Sarawak deka bankrap.
Penuduk Lim nyadi Menteri Wang ku iya, udah tentu bisi jalaipemadah ti tau dikearap.
Kelimpah ari nya, Lim mega bisi peamdah ke bekaul ari Opis Pekara Wang Menua Menua.
“Enti GPS terus ngena belanja chara nya (bajet alternatif) Sarawak deka bankrap,” ku iya.