KUCHING: Sapit Kepala Menteri Datuk Amar Douglas Uggah Embas asa ati ngagai pemutus perintah Pakatan Harapan (PH) ti ngetuka pengawa meri elawin ninting bulan RM500 ngagai chairman Komiti Pemansang enggau Pengelikun Genturung Pendiau (JKKK) Sarawak.
“Aku asa ati laban bepelasarka penerang Yang Berhormat Baru Bian kena 6 November tu tadi madah, berengkah taun baru enggau taun ke bukai, Sarawak nadai agi nerima RM500 ti disemaya PH dikena mayar elawin chairman JKKK.
“Aku minta semua chairman JKKK ngambika anang irauka pasal pemutus nya (perintah PH) laban Perintah Sarawak deka neruska mayar elawin RM900 ninting bulan ari Perambu Beajet Nengeri,” ku iya ti mega Menteri Betanam Betupi Moden, Tanah Adat enggau Pemansang Kandang Menua.
Uggah mansutka pekara nya nyerumba iya nyimpul jurai Opis Menteri Betanam Betupi Moden, Tanah Adat enggau Pemansang Kandang Menua ba Aum Ke-2 Penggal Ke-4 Kunsil Nengeri (DUN) Sarawak Ke-18 ba Kompleks DUN ditu, sehari tu.
“Ketegal nemu tanggungpengawa JKKK majak nambah sereta betapi enggau pemar, Perintah Sarawak udah ngungkupka RM100 juta dikena ngenegap sereta mantu institusyen JKKK,” ku iya.
Dulu ari nya Uggah madahka Perintah Sarawak udah netapka Garis Panduan bekaul enggau proses nyiri, nampung enggau ngetuka servis tuai raban bansa enggau ketuai bansa.
“Garis Lalau ti diasilka nya ngemuaska ati.
“Perintah Sarawak mega udah numbuhka siti komiti khas ti mansik enggau komprehensif dikena numbuhka pangkat baru ketuai raban bansa enggau ketuai bansa.
“Komiti tu deka netapka mekanisma dikena ngenyampatka pengawa nyirika ketuai bansa,” ku iya.
Berebak enggau tu Uggah meri terima kasih ngagai 17 Kaban Yang Berhormat ti meri sukung ngagai perintah nengeri ngambika terus tegap ngena Komiti Pemansang enggau Pengelikun Genturung Pendiau (JKKK) ti udah lama dikemeran sereta dipejalaika ba Sarawak.
Ba bulan Jun 2019 perintah Pakatan Harapan (PH) ngaga pemutus nukar JKKK ngagai MPKK lalu dalam timpuh ke sama Perintah Sarawak ngaga pemutus terus ngena JKKK, ku iya.
Pemutus Sarawak terus ngena JKKK mega udah disetuju sereta dikemendarka Menteri Pemansang Menua Pesisir Malaysia ke alai JKKK bejalaika pengawa ti sama.
Dalam timpuh ke sama maya nya suba ku iya, perintah PH ngaga pemutus ngurangka elawin chairman MPKK (di Sarawak JKKK) ngagai RM500, lalu ba Sarawak ketuai bansa iya nya Tuai Rumah, Ketuai Genturung Pendiau enggau Kapitan).
Iya madahka Perintah Sarawak agi netapka meri elawin ninting bulan RM900, taja pan polisi elawin baru Opis Menteri Pemansang Menua Pesisir Malaysia, iya nya RM500.
Kenyau ari polisi perintah PH semina mayar RM500, ku iya, dia Perintah Sarawak nambah tauka mayar laluh RM400 ngambaika chairman JKKK Sarawak terus nerima bayar elawin ninting bulan RM900.