KUCHING: Sapit Kepala Menteri Datuk Amar Douglas Uggah Embas madah, jaku ti ngumbai Perambu Bajet Nengeri 2020 enda realistik, nya penemu ti sengapa.
Iya ti mega Menteri Wang Kedua madah, penemu ti ngumbai perambu bajet nya ti enda realistik ngayanka sida nya kurang penemu pasal formula perambu belanja.
“Aku deka nimbal isu ti dibantaika Kaban Yang Berhormat Kota Sentosa, Pelawan enggau Krian bekaul enggau Perambu Belanja 2020.
“Sida madahka perambu bajet 2020 enda realistik laban nadai belanja ti ke amat disediaka dikena bejalaika inisiatif strategik.
“Tu jaku sengapa ti ngayanka sida enda nemu sereta kurang pemereti pasal ngaduka belanja sektor perintah lalu bakani Perambu Bajet Nengeri diformula,” ku iya.
Uggah mansutka pekara nya lebuh ti nyimpul jurai Opis Menteri Wang ba Aum Ke-2 Penggal Ke-4 Kunsil Nengeri (DUN) Sarawak Ke-18 ba kompleks DUN ditu, kemari.
Bejaku baru iya madahka dikena ngemaju enggau ngeyampatka pemansang di nengeri tu ngambika setipak enggau bakih di Semanjung Malaysia, beguna amat di nengeri tu ngena manah mekanisma belanja alternatif.
Penuduk belanja ti meruan enggau rizab ti besai asil pengelama betaun ke udah sereta gred pemeranak puku ti manah diaku gerempung pengaku antarabansa, udah meri awak ngagai Sarawak bulih pemansut belanja ari makit modal sereta nentuka fiskal nengeri fleksibiliti.
“Nya alai, program belanja pemansang 2020 deka dipelanja ari Perambu Bajet Nengeri nengah inisiatif belanja alternatif dikena bejalaika beberapa projek enggau program strategik.
“Aku deka bebendar madahka entara formula Perambu Bajet Nengeri digaga bepelasarka beberapa faktor ti pemadu beguna. Tu nyengkaum asil ti dipelabaka ti diulih ari asil chukai enggau ukai asil chukai ba taun nya.
“Lalu bekaul enggau chukai nyual nengeri ba produk petroleum, nya dipejalaika senipak enggau undang-undang nengeri sereta’hak kedaulatan’ Sarawak ari baruh Konstitusyen Perintah Besai,” ku iya seraya madah patut bendar pemansut penatai pemisi nya dibai ke dalam Perambu Bajet Nengeri.
Ku iya, nya suah dipejalai tauka dikemeranka dalam kededua sektor perintah enggau peribit dikena ngerikod asil ti dikearapka ba pengawa nyendiaka perambu belanja.