Anda di sini

RM50 juta dikemendar dikena nyambung bekal grid elekterik ngagai 128 buah sekula

Advertisement

KUCHING: Perintah Nengeri udah ngemendarka agih belanja RM50 juta dikena nyambung bekal grid elekterik ngagai 128 buah sekula ke diatu bepanggai penuh ba injin api.  

Menteri Pelajar, Sains enggau Pansik Teknologi, Dato Sri Michael Manyin Jawong madahka 128 buah sekula nya sebagi ari 317 sekula di nengeri tu ti enda disambung enggau gerid besai elekterik.

“Aku udah nganjung keretas kereja ngagai kabinet minggu nyin tadi minta agih belanja RM50 juta lalu Kabinet Nengeri udah ngemendarka nya,” ku iya maya aum media ba Kunsil Negeri (DUN) ditu, kemari.

Manyin ke mega Kaban Kunsil Nengeri (ADUN) Tebedu madah, RM9 milion udah dikemendarka perintah nengeri taun siti nyin tadi dikena mekal ai beresi ngagai beberapa buah sekula.

Diatu ku iya, sekeda sekula nya bepanggai ba ai ujan, sungai tauka telaga, pengasih Agensi Geosains.

Kedeua projek nya mengkang dipe jalaika lalu dipelabaka tembu digaga ujung taun 2020, ku iya.

“Beratika perintah Sarawak nagit 100 peratus bisi akses elekterik enggau bekal ai beresi ari baruh Atur Pemansang Malaysia Lumpar Ke-12 (RMK12), kitai ngarapka semua sekula ulih ngasaika pelasar perengkaguna tu nyerumba taun 2025,” ku iya.

Ditanya sentang projek hidrid solar ba sekeda sekula di menua pesisir nengeri tu, Manyin madahka projek nya benung digaga ti mungkur 31 kunteriktor ari taun 2014 nyentuk ke taun 2016.

Taja pia ku iya, ba taun 2017 semina siku kunteriktor ngaga projek nya ke beungkus RM1.29 bilion.

“Aku bisi macha berita ba ba surat kabar sentang pekara tu (kes kort ke bekaul engagu kunteriktor) enggau Opis Menteri Pelajar Malaysia. Tu nadai kaul enggau kitai (Opis Menteri Pelajar, Sains enggau Pansik Teknologi),” ku iya ba aum media nya.

Manyin madah munyi nya lebuh ke ditanya sekalika projek solar hidrid ba sekeda sekula di menua pesisir nengeri tu diteruska, laban beratika kes kort bekaul enggau kunteriktor nya agi dipejalaika.

Advertisement