Dikarang Rengenyan Labang
KUCHING: Sapit Kepala Menteri Datuk Amar Douglas Uggah Embas bepenemu jaku ti ngumbai Perambu Belanja Nengeri 2020 enda realistik, nya penemu ti sengapa.
Iya ti mega Menteri Wang Kedua madahka, penemu ti ngumbai perambu belanja nya ti enda realistik ngayanka kurang penemu sida nya pasal formula perambu belanja.
"Aku deka nimbal isu ti dibantaika Kaban Yang Berhormat Kota Sentosa (Chong Chieng Jen), Pelawan (David Wong) enggau Krian (Ali Biju) bekaul enggau Perambu Belanja 2020.
"Sida madah perambu belanja 2020 enda realistik laban nadai belanja ti amat disediaka dikena bejalaika inisiatif strategik.
"Tu sengapa madah ti ngayanka sida enda nemu enggau kurang pemereti pasal ngurus duit tauka belanja sektor perintah enggau bakani Perambu Belanja Nengeri diformula," ku iya.
Uggah mansutka pekara nya lebuh ti nyimpul jurai Opis Menteri Wang ba Aum Ke-2 Penggal Ke-4 Kunsil Nengeri (DUN) Sarawak Ke-18 ba kompleks DUN ditu, sehari tu.
Bejaku baru iya madahka dikena ngemaju enggau ngeyampatka penumbuh ba nengeri tu sereta ngambika setipak enggau bakih di Semanjung Malaysia, amat beguna ba nengeri tu ngena manah mekanisma belanja alternatif.
Penuduk tauka ikas belanja ti meruan enggau rizab ti besai asil pengelama betaun ke udah sereta gred pemeranak puku ti manah ke diaku ulih gerempung pengaku antarabansa, udah meri awak ngagai Sarawak bulih sumber belanja ari pasar modal enggau nentuka fiskal nengeri fleksibel.
"Nya alai, program belanja pemansang 2020 deka dipelanja ari Perambu Belanja Nengeri enggau nengah inisiatif belanja alternatif dikena bejalaika beberapa projek enggau program strategik.
"Aku deka bebendar madah entara formula Perambu Belanja Nengeri iya nya digaga bepelasarka beberapa faktor ti pemadu beguna. Tu nyengkaum asil ti dipelabaka ti diulih ari asil chukai enggau ukai asil chukai ba taun nya.
"Lalu bekaul enggau chukai jual nengeri ba produk petroleum, iya dipejalaika senipak enggau undang-undang nengeri sereta hak kedaulatan Sarawak ari baruh Konstitusyen Perintah Besai," ku iya seraya madah senipak bendar sumber penatai pemisi nya dibai ke dalam Perambu Belanja Nengeri.
Ku iya, nya suah dipejalai tauka dikemeranka dalam kededua sektor perintah enggau peribit dikena ngerikutka asil ti dikearapka dalam pengawa nyendiaka perambu belanja.