SIBU: Raban rock Iban keterubah, iya nya Masterpiece deka merindang bala peminat sida nengah Konsert ‘Merindang Ke Bintang’ 1 Dekad kena 7 Disember tu ila.
Menijar projek konsert nya, Avatea Clemson madahka konsert tu deka diatur ba Stadium Tetutup Sibu lalu pengawa nya ila berengkah ari pukul 5 lemai nyentuk ke 12 tengah malam.
Berebak enggau nya, konsert tu dikena ngerami penumbuh raban Masterpiece ke-10 ti be rengkah ari taun 2009 nengah album keterubah sida ya ‘Merindang Ke Bintang’.
Avatea madahka konsert tu ditujuka ngagai peminat raban rock nya ti enda kala leju nyukung sida ke ngelama tu udah ba industri muzik kitai Iban.
“Kami bisi nyendiaka 1,500 iti penuduk ba endur nya ila tang ngarapka mensia mayuh ti datai maya nya ila lebih ari nya, laban Stadium nya muat endur urung 4,000 iku.
“Tikit tu dijual berengkah ari rega RM50 nyentuk ke RM100 lalu tau dibeli ari website sida iya tauka meli ba stadium maya konsert nya ila.
“10 peratus ari rega asal tikit tu bisi dikurangka ungkup anembiak sekula, bepun ari Form Satu nyentuk ke tikas kolej/universiti,” ku iya maya bejaku ba aum media ‘Jelajah Promosi Konsert’ Merindang Ke Bintang’ 1 Dekad Masterpiece ti ba Star Mega Mall Sibu.
Kelimpah ari Avatea, bisi mega dua iku agi menijar konsert tu iya nya Mizta @ Asat Nawin enggau Otine @ Augtine Das Basih ari M.O Sarawak.
Konsert tu diatur begulai enggau AMG Events Management sereta M.O Sarawak ti dipelanja TGF Cosmetic.
Iya madah, minggu baru Masterpiece bisi ngagai Bintulu enggau Miri nyual tikit konsert sida ba dua bagi menua nya.
Lebuh ditanya pengarang berita bekaul enggau tikit konsert ti dijual di Kuching enggau Kapit ke sulu ari tu, dia iya madahka asil enggau sukung bala mayuh chukup manah sereta mayuh udah dibeli orang.
“Maya konsert tu ila, kami bisi ngundang raban penanyi ke bukai maya mega nya tikit pengawa nyabut benasit sereta nyual pemakai enggau ai irup ba luar stadium nya.
Sida mega madahka Menteri Muda Nembiak Lumba Enggau Main Datuk Snowdan Lawan dipelaba bisi ngulu program tu.
Ngagai bala mayuh ti deka bebelika tikit konsert Masterpiece tu, sida tau ngelawa website https://masterpiece.iticket.com.my tauka telefon ngagai Mathew Changgat ba lumur 014-5815776, Alex Yek (014-6691817), Enggong Eli (019-8596139) tauka Gerald (016-8989007).
Ke penemu rama, raban Masterpiece tu udah kala bulih mayuh anugerah ba industri muzik kitai Iban, entara nya baka Anugerah Raban Pemadu Tebilang maya Anugerah Muzik Dayak (AMD) 2010, Anugerah Klip Video Ti Pemadu Manah (AMD 2010), Anugerah Album Ti Pemadu Manah (AMD 2010), Anugerah Kulit Album Pemadu Manah (AMD 2010), Anugerah Artis Baru Pemadu Manah (AMD 2010), Anugerah Lagu Ti Pemadu Manah nengah Anugerah Juara Rentak Ruai (AJARR) Cat’s FM (2011), Anugerah Persembahan Ti Pemadu Manah pada Anugerah Carta Sapa Juara (ACSJ) WaiFM (2014), Champion ACSJ WaiFM (2016), lumur dua Pemadu Manah enggau Persembahan Ti Pemadu Manah ACSJ WaiFM (2017) dan Anugerah Artis Rock Ti Pemadu Manah (AMD 2014).