KUCHING: Opis Menteri Pengintu Pengelantang Pendiau, Pengelantang Raban Bansa enggau Orang Indu, Ruang Bilik enggau Pemansang Nembiak Mit deka nentuka 100% akses ngagai pelajar tumu anak mit di menua ulu manggai ba taun 2030.
Menteri opis nya, Dato Sri Fatimah Abdullah madah bepelasarka Opis Pelajar Nengeri Sarawak (JPNS) ba taun 2019, mandangka bisi 40,015 (97.41%) ari 41,078 nembiak dalam Primari 1 ba Sekula Perintah enggau Peribit udah ngambi pelajar tumu anak mit.
“Misyen opis menteri iya nya deka nentuka 100% akses ngagai pelajar tumu anak mit ba kandang menua ulu lebuh manggai ba taun 2030.
“Dikena nambahka akses ngagai pelajar tumu anak mit kelebih agi ba kandang menua ulu, dalam pekara tu enggau gaga ati aku deka madah iya nya kelima-lima begunan TADIKA Komuniti Penang (Long Leng, Long Kawa, Long Kerangan, Long Jenalong enggau Ba’ Selulong) ti digaga nengah program CSR Petronas, udah tembu magang sereta deka diatur sereta di pejalaika SeDidik Sd. Bhd. berengkah ari taun 2020,” ku iya.
Fatimah mansutka pekara nya lebuh ke nyimpul jurai opis menteri nya nyerumba Aum Ke-2 Penggal Ke-4 Kunsil Nengeri (DUN) Sarawak Ke-18 ba Kompleks DUN ditu, kemari.
Bekaul enggau perambu ti minta perintah nengeri ngambi tabika KEMAS baka ti dibantaika DUN Serembu (Miro Simuh), ku Fatima, opis menteri iya patut mansik sereta beratika perambu nya laban tabika KEMAS ari baruh perintah besai.
Kelimpah ari nya iya madahka opis menteri deka neruska inisiatif ngenegapka pengajar sereta pengembing nengah kus, woksyop enggau seminar.
Entara iya nya Seminar Pengerai enggau Pengelikun Pekereja ba Institusyen Pelajar Tumu Anak Mit (IPAKK); Woksyop Modul Asuhan Kanak-Kanak Berkeperluan Khas (AKBK); Seminar Kurikulum Standard Prasekolah Kebangsaan (KSPK); Woksyop Sains, Teknologi, Injiniring, Seni enggau Matematik (STEAM); Program Bersih Awal Bersih Akhir (BaBa) sereta Randau Pemansang Tumu Anak Mit.
“Naka 31 Oktober 2019, bisi 1,049 penyereta ari pengajar enggau pengembing,” ku iya.
Nambahka nya Fatimah madahka perintah nengeri chukup beratka pasal kualiti pelajar enggau penyaga tumu anak mit di Sarawak.
Berindik ari pekara nya ku iya, perintah nengeri numbuhka Geran Khas Ninting Taun (GTK) ungkup semua institusyen pelajar tumu anak mit di Sarawak ti berejista.
Ku Fatimah, opis menteri iya sedar tauka nemu penyampau agih belanja bisi dikurangka lebih agi ngagai TABIKA enggau TASKA KEMAS.
“Ungkup belanja dikena ngaduka baru tauka ngemanahka TABIKA enggau TASKA KEMAS ba taun 2020 iya ny RM200 ribu aja dibandingka RM489 ribu ba taun 2019 enggau RM510 ribu ba taun 2018.
“Ba taun 2019 mega, semua tadika peribit ti berejista enggau JPNS nadai agi nerima bantu Yuran Tadika Peribit, tang ba taun 2018 sepenyampau RM2.5 juta udah diberi ke tuju tu.