Dikarang Rengenyan Labang
KUCHING: Perintah Sarawak meri belanja sepenyampau RM5.4 bilion dikena bejalaika 97 Projek Rayat di serata Sarawak.
Sapit Kepala Menteri Tan Sri Datuk Amar James Jemut Masing madahka Opis Menteri Infrastruktur enggau Pemansang Palan Penyangkai Kapal enggau Jabatan Kerja Raya (JKR) Sarawak matau projek rayat sereta mutarka penanggul ti nagang projek nya dipejalaika.
"Diatu, opis menteri aku diberi tanggungpengawa bejalaika sepenyampau 97 Projek Rayat di serata nengeri Sarawak, ti dipelanja ulih Perintah Sarawak.
"Semua 97 Projek Rakyat nya nyengkaum 57 projek jalai ti berega urung RM2.6 bilion; 17 projek jematan (urung RM2.2 bilion); 21 bangunan (urung RM336 juta) enggau dua padang bilun ti urung RM301 juta.
"Aku deka madahka ngagai Kunsil Nengeri tu bekaul enggau progres pejalai 97 Projek Rayat bepelasarka rayat ti dipelanja Perintah Sarawak iya nya lapan udah tembu; 52 benung digaga, semilan diatu benung dalam perintagkat tinda enggau 28 projek ba peringkat ngelangkar," ku iya ti nyadi Menteri Infrastruktur enggau Pemansang Palan Penyangkai Kapal.
Masing mansutka pekara nya lebuh ti nyimpul jurai opis menteri nya ba Aum Ke-2 Penggal Ke-4 Kunsil Nengeri (DUN) Sarawak ba Kompleks DUN ditu, seharitu.
Projek Rayat iya nya inisiatif dipejalaika Kepala Menteri dikena nyungkakka ekonomi Sarawak nengah pengawa ngenyampatka pengawa ngaga projek pemansang.
"Dikemeratka dulu iya nya pengawa bejalaika projek rayat ti lebih agi infratsrutur di menua pesisir baka jalai, bekal ai, bekal elektrik, telekomunikasyen enggau ke bukai," ku iya.