SIBU: “Kandang menua Sibu enda tinggal ari pemansang tang runding ti kelalu pabu ngasuh kitai seruran ngasaika pemerinsa,” ku Chairman Opis Kaunsil Mengeri Sibu (SDC) Clarence Ting.
Clarence lebuh mansut ka jaku tu ba program Pelin Transformasyen Sibu (STP) ti berambai jaku ‘Ngangkatka Pemansang Ba Kandang Menua Sibu’, pagi kemari.
Urung 60 iku mensia mayuh bisi enggau ngulu pengawa randau STP nya ti betuaika Kunsilor Robert Lau Hui Yew.
“Penyilap ti besai ari sekeda rayat kitai ditu iya nya, suah ngembuan runding ti ngasaika menua tu jauh tinggal ari pemansang sitak menua kebukai sereta ninga lalu ngemanaka jaku sepiak aja,” ko tampung jaku Clarence maya ti belicha.
Iya madah, rayat enda tau enda berserakup ati sereta sepenemu lebuh maya berundingka chara dikena nyulut sereta ngemansangka menua, nengah program STP tu.
Berebak enggau nya, Lau mega bisi madahka pengandal iya ba kandang menua Sibu tu dudi hari ila ti deka sama tikas pemansang enggau kandang menua bukai.