Anda di sini

Mong nyukung sereta ngarap SADA ditumbuhka

 Mong lebuh ti bejurai sereta nyukung perambu belanja nengeri 2020, kemari.
BEJURAI: Mong lebuh ti bejurai sereta nyukung perambu belanja nengeri 2020, kemari.

KUCHING: Datuk Mong Dagang (GPS - Bukit Begunan) nyukung  penemu Kaban Kunsil Nengeri (ADUN) Balai Ringin Datuk Snowdan Lawan, ke alai Sri Aman patut bisi ejensi pemansang ti dikumbai Ejensi Pemansang Sri Aman (SADA).

Ku iya, diatu bisi empat ejensi pemansang ditumbuhka perintah nengeri iya nya Ejensi Pemansang Kandang Menua ‘Bersepadu’ Samarahan (IRSDA), Ejensi Pemansang Ulu Rajang (URDA), Ejensi Pemansang Tanah Tinggi (HDA) enggau Ejensi Pemansang Kandang Menua Utara (NRD).

Empat ejensi tu bejalaika pengawa merambu, ngatur sereta bejalaika beberapa program pemansang ba kandang endur ti kena bungkur ejensi nya.

“Dalam perambu belanja 2020 diungkupka belanja besai ngagai ejensi pemansang tu. Taja pia, Bagi Menua Sri Aman nadai kena bungkur empat ejensi pemansang nya (IRSDA, URDA, HDA, NRD).

“Nya alai aku amat nyukung langgur ti diperambu ADUN Balai Ringin ti mega Menteri Muda Nembiak Lumba enggau Main. Dalam jaku pengelalu iya maya pengerami bejadika GPS Zon 11 ba pasar mit Lachau kena 24 Ogos 2019 ti bisi digulu YAB Kepala Menteri, Menteri Muda tu bisi meri penemu iya ngambi numbuhka ejensi pemansang ti mungkur bagi menua Sri Aman,” ku iya.

Mong mansutka pekara maya bejuraika perambu belanja nengeri 2020 ba Aum Ke-2 Penggal Ke-4 Kunsil Nengeri (DUN) Sarawak Ke-18 ba Kompleks DUN ditu, kemari.

Bejaku baru, iya madahka bagi menua Sri Aman endang bisi ejensi nengeri baka opis pelilih menua,Opis Kereja Raya, Opis Parit enggau Entali Ai, Majlis Daerah Sri Aman enggau Opis Residen bejalaika tanggungpengawa tang manah agi enti bisi ejensi korporat ti enda sama bejalaika pengawa meda semua pemansang ba bagi menua enggau lebih teratur sereta sistematik.

“Enggau diadu sereta dipejalaika raban profesional, aku arap bendar ejensi nya (SADA) ulih ngemansangka Bagi Menua nyadi kandang menua ti lebih dinamik di nengeri tu.

“Tu ukai semina pekara ti dikearapka aku aja tang mega utai ti dikearapka rayat nyengkaum pengari rayat ari bagi menua Sri Aman ti deka meda penumbuh ejensi pemansang ti mai pemanah ngagai mensi mayuh dalam bagi menua Sri Aman.

“Ejensi nya patut ditelah enggau nama Ejensi Pemansang Sri Aman (SADA) tauka nama bukai,” ku iya seraya ngarapka langgur tauka perambu nya ulih diperundingka ke pemaik rayat Sri Aman.