Anda di sini

RM358.4 juta udah dipelanja ke pemansang pelajar di nengeri tu

KUCHING: Perintah Sarawak udah melanjaka sepenyampau RM358.4 juta ungkup pemansang pelajar di nengeri tu kenyau ari Opis Menteri Pelajar, Sains enggau Pansik Teknologi ditumbuhka kena 17 Mei 2017.

Menteri Muda Pelajar, Sains enggau Pansik Teknologi Dr Annuar Rapaee madahka nya mandangka perintah nengeri tu chukup beratka pekara pelajar taja pan nemu nya tanggungpengawa perintah besai.

Ku iya, perintah nengeri udah ngungkupka RM342 juta dikena ngaga infrastruktur enggau fasiliti sekula aja, ti nyengkaum dua buah sekula baru iya nya SK Maludam enggau SK Ulu Stengang.

“Nambahka nya ari baruh inisiatif transformasyen menua pesisir, 60 buah sekula udah dikemanahka baru ngena belanja RM50 juta dikena nyendiaka bekal kuasa elekterik.

“Lalu 33 buah sekula agi deka bulih penguntung ari pengawa nyendiaka bekal ai beresi ari baruh Kaunsil Pemansang Kandang Menua Utara lalu RM160 juta dikena ngemanahka sekula di Lawas enggau Limbang,” ku iya lebuh ti nyaut tanya ari Abdul Yakub Arbi (GPS - Balingian).

Iya nyaut nya dalam sesi tanya saut Aum Ke-2 Penggal Ke-4, Kunsil Nengeri (DUN) Sarawak Ke-18 ti diatur ba Kompleks DUN ditu, kemari.

Bejaku baru iya madah, dikena ngangkatka pemanah modal mensia perintah nengeri udah melanja urung RM15.7 juta dikena bejalaika Program Nyadi Ketuai di Sekula laban penau nyadi ketuai ulih mai penyulut ngagai sekula.

Kedua, kitai matih pengajar ti ngajar subjek STEM kelimpah ari ngatur seminar dikena ngangkatka pengelandik pengajar ngajar dalam Jaku Inggeris (BI), lalu apin lama kitai udah diberi peluang ngena Inggeris ngajar ba subjek STEM lalu diungkupka RM11 juta ke tuju nya, ku iya.

“Semua nya kenyau ari opis menteri tu ditumbuhka, perintah nengeri udah melanja RM358.4 juta,’ ku iya.

Lebuh ti nyaut tanya bekaul enggau penyampau belanja ari perintah besai dikena ngaga tauka ngemanahka sekula ti udah tuai sereta repuk di nengeri tu , Dr Annuar madahka dalam taun 2017 perintah besai ke sebedau tu bisi ngemendarka RM1 bilion ngagai 1,020 buah sekula ti udah tuai sereta repuk enggau 415 buah udah kelalu balat jai sereta repuk.

Nitihku iya,  RM419 juta belanja nya dikena melanja 116 buah sekula lalu ari penyampau sekula nya, (116) bisi 50 buah sekula udah tembu dikemanah ari baruh Opis Kereja Raya (JKR).

Ari 66 buah sekula ti ari baruh Opis Menteri Pelajar, bisi 13 buah sekula ditemu projek ‘sakit’, ku iya.

“Nya alai aku minta tulung Kaban Parlimen Pakatan Harapan (PH) mai isu tu ngagai renggat perintah besai. Tiga belas (13) buah sekula tu ari baruh Opis Menteri Pelajar tu dikategori ‘sakit’,” ku iya.

Ba taun 2018 kitai udah melanja RM419, taja pan penyampau ti disemaya perintah besai RM500 juta, lalu ba taun 2019 kitai patut diagihka RM500 juta tang semina diungkupka RM100 juta, ku iya.

“Lalu balat agi ba perambu belanja 2020 kitai kebendar nadai diungkupka sesen. Sepenyampau RM350 juta ti diungkupka nya ke bendar iya duit ti dikena kitai mayar lduit injau,” ku iya.

Kelimpah ari nya, lebuh ke nyaut tanya bekaul enggau penguntung ari numbuhka sekula antarabansa di nengeri tu, Dr Annuar nerangka perintah nengeri deka numbuhka lima buah sekula antarabansa.

Iya madahka sekula nya deka meri peluang ngagai nembiak menua pesisir enda ngira bansa ke bulih pemutus ti manah dalam UPSR tau minta nampung pelajar ngagai sekula nya.

“Tu sebagi ari demokrasi pelajar kitai ke alai tetiap iku orang bisi hak dalam pelajar. Kualiti sekula antarabansa enggau standard pelajar,” ku iya.