Anda di sini

Balai bomba deka digaga ba sekeda pasar mit menua pesisir Sarawak

Advertisement
 


KUCHING: Perintah Sarawak nengah Opis Bomba enggau Penyelamat Malaysia (JBPM) Sarawak bisi langgur deka numbuhka lebih mayuh balai bomba ba pasar mit menua pesisir nengeri tu.

Menteri Muda Kaunsil Kandang Menua enggau Pengawa Berumah Datu Penguang Manggil madahka, nya berindik ari penusah angus ti suah nyadi lebih agi ba rumah panjai.

"Penusah angus bekaul enggau rumah panjai majak ngirauka. Bepelasarka statistik ari taun 2017 ngagai 2019, bisi 26 kes penusah rumah panjai angus dalam taun 2017, 24 kes (2018) enggau dalam timpuh Januari ngagai April 2019 bisi lima kes.

"Berindik ari penyadi penusah angus rumah panjai ti balat nyadi, Perintah Sarawak nengah JBPM Sarawak bisi langgurdeka ngaga beberapa balai bomba di pasar mit menua pesisir baka Batu Niah, Beluru, Lapok, Long Lama enggau tebedu sereta ba endur ke bukai ti semak kandang endur menua pesisir," ku iya.

Penguang mansutka pekara nya lebuh ti nyaut tanya ari Martin Ben (GPS - Kedup) maya sesi tanya saut Aum Ke-2 penggal Ke-4 Aum Kunsil Nengeri (DUN) Sarawak Ke-18 ba Kompleks DUN ditu, sehari tu.

Dulu ari nya lebuh ti ngenang pasal perambu perintah ngaga Balai Bomba di Pelilih Menua Tebedu, Penguang madahka palan endur ngaga Balai Bomba enggau Penyelamat Tebedu udah dikemendarka perintah nengeri ba taun 2009 iya nya ba Lot 298, Blok 8, Kayan Land District.

Opis Bomba enggau penyelamat udah ngenataika perambu ngaga Balai Bomba Tebedu di dalam Langgur Pemansang Malaysia Lumpar Ke-11 (RMK-11).

Taja pia, ungkup belanja ti diperambu dikena ngaga balai bomba tu enda dikemendarka perintah besai dalam RMK-11, lalu JBPM deka nganjung baru perambu ngaga Balai Bomba enggau Penyelamat Tebedu dalam RMK-12, ku Penguang.

"Nyema Balai Bomba enggau Penyelamat Tebedu digaga, iya digaga ngena infrastruktur kategori D ti nyengkaum blok pentadbiran, berek injin bomba , worksyop, menara hos sereta padang kawad, lalu semua nya begunaka belanja urung RM3.5 juta.

"Lalu balai bomba kategroti D  tu deka disikap ngena 10 iku pegawai bomba sereta 15 iku volenteer bomba.

"Nambahka nya disikap ngena seunit fire rescue tender, dua unit kereta utitli enggau seunit bot penyelamat," ku iya lebuh nyaut tanya tambah ari Kedup, sehari tu. 

Advertisement