MIRI: Pengawa numbuhka Biro Indu endang dikena meransang tetiap Komiti Pemansang enggau Pengelikun Genturung Pendiau (JKKK) ba tetiap rumah panjai enggau genturung pendiau ngaduka pengelantang pendiau, pemansang enggau aktiviti orang indu.
Menteri Muda Orang Indu, Ruang Bilik enggau Pemansang Tumu Anak Mit, Rosey Yunus madahka orang inndu ti diau di rumah panjai enggau genturung pendiau bejalaika barang bagi pengawa besai, laban sida mih ti lebih komited sereta relevan.
“ Nengah pengawa numbuhka Biro Indu ba tetiap genturung pendiau enggau rumah panjai, aktiviti orang indu enggau komuniti ti diatur deka meri manah agi empas, “ ku Rosey lebuh bejadi Biro Indu ba Rumah Limbang Sk Kaiyang, Saeh Niah.
Sama bisi ngulu pengerami nya, kunsilor Hadijah Shiekh Kassim enggau kunsilor Sulaiman Ahmad.
Ku Rosey, Biro Indu bejalaika pengawa ke chukup besai ngelakuka ekonomi enggau pengawa rama ungkup tim puh panjai ngagai komuniti dalam kandang menua sida.
Ku iya, kaban komiti Biro Indu nyadi raban penyukung ngagai JKKK sereta deka seruran nyendiaka bantu ngagai orang ke napi pemar lalu mai pengagai ngagai sida maya bisi pengerami.
“ Biro Indu mantu ngintu penyeakup engagu kerejasama dalam genturung pendiau engagu rumah panjai sereta nentuka pengelikun enggau pengelantang, “ ku Rosey.
Ku iya, kaban komiti Biro Indu diperansang belajarka mayuh bengkah pengelandik nyengkaum ba industri kotej, bejait, nyumai enggau ngaga kue ngambika ulih mantu nyungkak penatai pemisi ruang bilik.
Orang indu kemaya hari tu ku iya, enda tau enda ngembuan penemu seretasebaka penuduk enggau orang lelaki ngambika ulih mujur sereta maju.
Ba pengerami nya, Rosey ke mega Kaban Kunsil Nengri Bekenu ngungkupka belanja RM5, 000 ngagai Biro Indu Rumah Limbang ngambika bisi dikena sida ngatur aktiviti lalu RM15, 000 ngagai JKKK dikena ngaga stor sereta ngatur bemacham aktiviti.