SRI AMAN: Pengajar kreatif enggau inovatif ulih nempa rebak nembiak ti nyulut seriris enggau juluk menua.
Menteri Muda Pengelantang Komuniti Datuk Francis Harden Hollis madah, pengajar ngembuan runding ke baru ti ulih mai ubah dalam sistem pelajar sida.
“Nya kebuah, kitai ngansak bala pengajar di pelilih menua tu ngambika ngubah chara ngajar sida ke dulu ngagai chara ke lebih kreatif enggau inovatif dalam proses ngajar nembiak.
“Chara ti kreatif enggau inovatif ulih narit pengerindu bala nembiak ba siti-siti subjek,” ku iya.
Iya ke mega Kaban Kunsil Nengeri (ADUN) Simanggang madah munyi nya maya bejaku bejadi Program Kesedaran Advokasi Pendidikan Sosial Siri 1/2019 di Sekula Sekondari (SMK) Engkilili ditu.
Ku iya, pengajar patut landik mai ubah ngagai gaya ngajar sida enggau lebih kondusif ngambika tetiap subjek ke diajar datai ba tuju nya.
“Tu beguna bendar laban bala nembiak deka mantaika pengingin sida deka belajarka sekeda subjek enti chara ngajar pengajar sida nitihka pemansang jeman diatu,” ku iya.
Berebak enggau nya, Harden mega ngansak bala apai indai ngemeratka pelajar anak sida laban sida nya ti deka nyadi ketuai sereta orang ti beguna mega dalam ngemansangka menua tu.
“Kitai ti nyadi apai indai anang enda ingat ngagai tanggungpengawa kitai nganjung anak ke sekula ngiga penemu naka ke ulih laban jeman diatu penemu pelajar nya beguna amat.
“Anang mega kitai ngumbai pengawa nganjung anak ke sekula nya pekara ti ngenusahka,” ku iya.
Iya nambah, penyeranta ukai agi chara alai kitai enggai nganjung anak ke sekula.
“Pia mega, mayuh orang ke seranta nganjung anak ngagai tikas pelajar tinggi, lalu ngasaika pemujur ba universiti.
“Aku pechaya, mayuh apai indai diatu nemu tanggungpengawa sida nganjung anak ke sekula laban sida (apai indai) nemu sentang ke guna pelajar nya aja ti ulih ngubah gaya pengidup kitai,” ku iya.
Sentang pemansang bekaul teknologi penerang enggau komunikasyen (ICT), Harden madah raban nembiak maya diatu patut nyikap diri enggau penemu ICT laban nya beguna amat kelebih agi maya ngiga kereja.
“Apai indai mega bisi tanggungpengawa meransang anak belajarka ICT. Enti anak kitai enda landik ba ICT, tusah ba sida besemekih enggau nembiak bukai maya begigaka kereja dudi hari,” ku Harden.
Sama bisi datai ngulu pengerami tu iya nya Residen Bagi Menua Sri Aman Indit Bangai, Principal SMK Engkilili Dickson Palot Malintan, pengari Pelilih Menua Lubok Antu Ignatius Ayai Dom, pengari Sekretari Opis Pelilih Lubok Antu Audrey Chimbi sereta ke bukai.
Pia mega, program nya dirichahka agi enggau licha ari MPS, Opis Menteri Orang Indu, Ruang Bilik enggau Pemansang Nembiak Mit (KWKPK), Polis Diraja Malaysia (PDRM) sereta ejensi ke dipilih bukai.