KUCHING: Pengawa meri Elawin Khas Skim Servis Bomba RM200 sebulan ti dibantai dalam Bajet 2020 bedau lama udah, mandangka servis raban bomba nya mega beguna sebaka enggau ejensi pengelikun ke bukai di menua tu.
Direktor Opis Bomba enggau Penyah Penusah Malaysia (JBPM) Sarawak, Khirudin Drahman madah, semua raban JBPM beterima kasih sereta lantang ati laban perintah ke udah meri nya.
“Bajet 2020 ti meri RM200 sebulan ukai ngamatka peminta raban tu ngelama tu tang mega nyadi ke pengeransing sida terus bejalaika servis pemadu manah ngagai rayat,” ku iya.
Iya madah munyi nya lebuh bejaku ba pengerami bejadi Program Penegap Ketuai Zon enggau Balai Siri 2/2019 Renggat Borneo ba Palan Konvensyen Penview (PCC) Demak ditu, kemari.
Pengerami nya dipenyadi Ketuai Direktor JPBM, Datuk Mohammad Hamdan Wahid.
Dalam Belanja 2020, Menteri Pekara Wang Lim Guan Eng madah semua raban JPBM deka nerima Elawin Khas Skim Servis Bomba sepenyampau RM200 sebulan nengah agih belanja RM35 juta ba taun 2020, ti meri pemaik ngagai 14,400 iku raban bomba.
Bejaku sentang pengerami nya Khirudin madah, bisi 70 iku pemesai ari Ketuai Zon enggau Balai ari Zon Borneo ti mungkur Sarawak, Sabah enggau Labuan ngambi bagi dalam program nya.
Ku iya, program Penegap Ketuai Zon enggau Balai Siri 2/2019 ke diatur pengelama lima hari berengkah kemari nyentuk 18 Oktober 2019 tu, tuju deka meri licha sentang pemansang enggau tuju pengawa opis nya.
“Berebak enggau nya, aku arap pesereta ulih nguna pemaik penemu ke diambi nengah program tu ulih bekunsika penemu ngagai bala kaban ke bukai,” ku iya.