LIMBANG: Pakatan Harapan (PH) udah bisi 82 iku chalun ke bisi potensial bediri minta pilih ba Pengawa Bepilih Nengeri (PRN) ti deka datai nyengkaum ungkup sitak Kunsil Nengeri (DUN) Bukit Kota enggau DUN Batu Danau.
Pengari Menteri Kereja Raya Abang Zulkifli Abang Engkeh madah, PH Sarawak udah bisi chalun dikena napi PRN ke deka datai bepelasarka pemansang parti nya ke diatu.
“PH udah bisi 82 iku chalun ungkup Sarawak dikena napi PRN ke deka datai bepelasarka pemansang parti nya ke diatu.
“Pengawa mantaika chalun deka dibantaika Chairman PH Sarawak Chong Chieng Jen enggau Chairman Parti Keadilan Rakyat (PKR) Sarawak Baru Bian ba maya ke patut ila,” ku iya ba aum media Numbuhka Ranting PKR DUN Bukit Kota di Dewan KEMAS ditu kemari.
Sama bisi datai Ketui Pampang PKR Limbang Dr Lau Liak Koi enggau chairman melanja program Rosli Amat.
Abang Zulkifli ke mega sekretari berita Baru madah, PH deka mai sekeda isu rayat kelimpah isu salah nguna kuasa enggau makai suap maya PRN ila.
“Isu kami (PH) endang konsisten ari suba ba pengawa munaska ulah salah nguna kuasa enggau makai suap maya PRN ila.
“Kelimpah ari nya isu ke semak ba ati raban bansa orang Ulu, Dayak dan Melayu bekaul tanah Hak Adat Bumiputera (NCR), penyeranta, nadai ai beresi enggau ke bukai ti deka ditegika laban raban bansa kitai napi isu nya,” ku iya.
Ku iya, PKR Pampang Limbang diatu bisi urung 4,000 iku kaban ke berejista lalu nagit penyampau ke mayuh dalam timpih ke semak tu.
“Kami deka ngambi naka pemayuh ke ulih nyadi kaban PKR ke berejista di Limbang.
“Naka ke diatu timbal kelebih agi rebak biak chukup manah lalu nemu kitai enda begilik penemu negika pekara ti deka ditegi lalu nemu kuing deka ngubah rayat lalu nulak politik ti ngayaka kroni,” ku iya.
Ku iya, PH kelebih agi Menteri Kereja Raya Baru Bian ti asal penatai ari menua pesisir deka meda pemansang semua jalai di menua pesisir dikemansang enggau manah ngena chara ke dikemisi.
Perambu nya ku iya, nyengkaum ngemujurka projek besai baka jalai besai Sarawak-Sabah ti nyambungka Sabah enggau Sarawak tai enda nengah Brunei.
Jalai besai nya ila mega deka tama ke Limbang nengah Medamit lalu mantupka guna rayat di menua pesisir.
Lebih 700 iku datai ngulu program nya.