KUCHING: Sarawak Energy udah ngemunka kaunter servis ungkup klien ti baru bedau lama ti udah di Bintulu Town Square ti bepalan ba Jalai Tun Ahmad Zaidi.
Pengerami nya udah dipenyadi Menteri Utiliti Dato Sri Stephen Rundi Utom ke mega udah diatur pengawa nyuaka genset baru ungkup kandang menua Bintulu.
Genset nya nyadi siti ari tanggungpengawa ti terus dikemeratka kompeni ba pekara ngangkatmanah enggau inovasyen dalam meri servis ngagai mensia mayuh.
“Meri puji ngagai Sarawak Energy atas bantu sida ba pemujur servis mensia mayuh di Bintulu nengah kaunter servis mensia mayuh ti baru tu enggau genset nya,” pia ku Rundi ba pengerami nya.
Nitihka Rundi, kaunter servis ti ditumbuhka baru tu seriris nitihka pemansang ti chakah dipejalaika di Bintulu enggau ke guna mensia mayuh ba servis ke lebih manah sereta moden.
“Pekara dikemeratka Sarawak Energy ba ngemanahka servis mensia mayuh di Bintulu mandangka pengawa ti dipejalaika sida di serata Sarawak.
“Aku ti asal ari kandang menua Bintulu berasai gaga laban kaunter servis tu nyendiaka gaya ke moden agi sereta kondusif nengah akses ke lebih manah ungkup peranak di Bintulu.
“Nambahka nya, genset tu ulih ngurangka pemar ke ditapi mensia mayuh nengah lengkas ngemutarka pekara maya penusah ngenyit nyadi,” ku iya.
Sama bisi datai ba program tu iya nya Ketuai Pemesai Eksekutif Raban Sarawak Energy, Datuk Sharbini Suhaili, Ketuai Pemesai Eksekutif Kompeni SESCO Berhad, Lau Kim Swee enggau raban pengatur kanan Sarawak Energy.
Sharbini madah naka tu, Sarawak Energy udah manah agi dalam indek servis mensia mayuh ke nyapai lebih 90 peratus tikas pemuas servis bepelasarka gred ngagai mensia mayuh.
Taja pia ku iya, Sarawak Energy nemu agi bisi servis ke patut diangkatmanah enggau indek pemujur nya nengah beranakka puku ba proses sereta teknologi rayat.
Lau mega madah, trak genset nya khas ungkup dikena ngengkahka genset 2x500kVA nengah pilih siti tauka kededua genset sama dikena maya nya.
“Genset disikap ngena utai ke ulih ngidupka genset tu enggau manah agi sereta ergonomik ke manah ungkup mensia mayuh ba raban teknikal kami,” ku Lau.
Kaunter servis Sarawak Energy dipejalaika ari 8.30 pagi ngagai 4 lemai berengkah Hari Satu nyentuk Hari Lima lalu tutup maya ujung minggu enggau hari besai.
Palan tu mega bisi diseretaka enggau kiosks bayar ti nerima transaksyen nyentuk 11.30 malam ninting hari.