MIRI: Sarawak Energy Berhad (SEB) udah ngatur pengerami makai lemai ti diberi nama ‘Miri Media Get Together’ ungkup pengemeran media ari bemacham ejensi di sebuah hotel tebilang ditu bedau lama.
Direktor Besai Komunikasyen Korporat Peing Tajang madah, pengerami makai lemai nya diatur ninting taun nya sebagi ari chara SEB meri tanda basa ngagai pengemeran media.
“Program ninting taun tu sebengkah ari pelasar alai kami di Komunikasyen Korporat meri terima kasih enggau basa atas peluang ti diberi pemberita dalam nyadung berita ke betul sereta sebela ngagai SEB ngelama tu.
“Aku mega ngarap kaul rat entara SEB enggau bala pemberita meruan tegap ngambika ulih bekerejasama manah dudi hari ila,” ku iya lebuh ngenataika jaku pengelalu iya.
Iya madah Opis Komunikasyen Korporat SEB mega majak ngerembai nengah pengereja pengawa ke bisi nambah dikena ngenegapka agi kaul entara kompeni enggau ejensi ke bekaul.
“Raban Komunikasyen Korporat kami mega udah ngerembai lalu meri basa sentang guna ba komunikasyen ti betul sereta manah enggau ejensi kami,” ku iya.
Berebak enggau nya, urung 60 iku pengemeran media ari mayuh bengkah ejensi bisi ngulu pengerami nya.
Kelimpah makai lemai, bisi mega aktiviti bukai ke diatur baka tikit benasit, main kerusi muzik enggau nyepu gelembung.