MUKAH: Pengawa mantaika Bajet 2020 ari Menteri Wang Lim Guan Eng Hari Lima tu tadi ngembuan reti kediri kelebih agi ngagai Sarawak.
Kaban Kunsil Nengeri (ADUN) Balingian Abdul Yakub Arbi madahka perambu bajet nya ulih dikesema baka undang diselepak batu.
“Kitai nemu iya nya Sarawak enda lama agi deka ngatur Pengawa Bepilih Nengeri (PRN) iya nya naka penumu pan ba taun siti nyin ila lalu bajet ke dibantai kemari (Hari Lima) dipeda aku baka undang diselepak batu, kelebih agi ungkup Sarawak,” ku iya madah ngagai Utusan Borneo.
Nitih ku iya, ari penyampau bajet ungkup semua nya bisi nambah semina bisi diberi pengelebih ba kaul ‘mesra Pakatan Harapan (PH)’ baka di Sabah.
Enti dipeda ba agih belanja pemansag, ungkup Sabah iya nya RM5.2 bilion lalu Sarawak RM4.4 bilion lalu sentang beri khas RM53.4 juta ungkup Sabah lalu RM32 juta ungkup Sarawak.
Agih belanja ungkup projek menua pesisir di Sabah iya nya RM326 juta lalu Sarawak iya nya RM224 juta.
Kelimpah ari nya, nadai subsidi petrol, semina ngetanka rega RON95 ungkup Sabah enggau Sarawak.
Enti diperati ba agih belanja ti diberi nya, tu nyata bajet nya enda setipak enggau pemesai kandang menua, Sarawak besai lalu udah tentu begunaka agih belanja ti mayuh.