MIRI: Bisi 29 iku penerima diberi gelar enggau pingat ‘kebesaran negeri’ ari Tuai Megai Menua (TYT) Tun Pehin Sri Abdul Taib Mahmud beserimbai enggau pengawa ‘Istiadat Pengurniaan Darjah-Darjah Kebesaran Negeri Sarawak’ di sebuah hotel tebilang ditu kemari.
Rintai keterubah iya nya Sekretari Perintah Nengeri Datu Jaul Samion ke diberi gelar Datuk Amar Bintang Kenyalang Sarawak (D.A) ke mai gelar Datuk Amar.
Dua iku agi penerima ke sama iya nya Sekretari Pekara Wang Nengeri, Dato Sri Ahmad Tarmizi Sulaiman enggau Dato Sri Dominic Andrew Dago ke mega ex-Kaban Parlimen Serian.
Pia mega Menteri Kaunsil Kandang Menua enggau Pengawa Berumah, Prof Datuk Dr Sim Kui Hian diberi gelar Panglima Bintang Kenyalang (PNBS) ari TYT ke digelar Dato Sri.
Dua iku agi nerima gelar Dato Sri iya nya ex-menteri muda Datuk Gramong Juna enggau Sapit Sekretari Menua, Datu Mohamad Abu Bakar Marzuki.
Berebak enggau nya, lapan iku ke bukai udah diberi gelar Panglima Gemilang Bintang Kenyalang (PGBK) nyengkaum tiga iku menteri muda bulih gelar ‘Datuk’, iya nya Kaban Kunsil Nengeri (ADUN) Bukit Kota, Dr. Abdul Rahman Ismail, ADUN Samariang, Sharifah Hasidah Sayeed Aman Ghazali sereta ADUN Batang Ai, Malcolm Mussen Lamoh.
Lima ke bukai nya baka ex-Datuk Bandar Dewan Bandaraya Kuching Utara (DBKU), Datuk Abang Abdul Wahab Abang Julai, Chairman Shell Malaysia, Datuk Iain John Lo, Abdul Kadir Sahib, Ketuai Pemesai Eksekutif Petroleum Sarawak Berhad, Saau Kakok enggau Bishop Anglican, Danald Jute.
Lima iku pemesai kanan Perintah Nengeri udah diberi basa nengah Darjah Jasa Bakti Sarawak (DJBS) ti mai gelar Datu, iya nya Sekretari Mendam, Bakrie Zaini; Zaidi Mahdi; Antonio Kahti Galis; Hamden Mohammad enggau Chok Moi Soon.
Penerima Panglima Setia Bintang Sarawak (PSBS) ti mai gelar Dato’ udah diberi ngagai ADUN Muara Tuang, Dato’ Idris Buang, ex-ADUN Nangka, Dato’ Awang Bemee Pengiran Ali Basah, Ibrahim Baki, Leonard Martin Uning, Bujang Mohidin Jol, Rakayah Madon, Temenggong Abdul Rahman Fadzail, Temenggong Samuel Lawen, Wong Tiong Hook enggau Mohamad Marzuki Mohamad Omar.
Pengawa ‘istiadat’ nya udah diatur beserimbai pengerami ngintu pengada ke-83, Tun Pehin Sri Taib.
Sama bisi datai pengawa tu iya nya bini iya, Toh Puan Datuk Patinggi Raghad Kurdi Taib; Kepala Menteri Datuk Patinggi Abang Johari Tun Openg enggau bini, Datuk Amar Juma’ani Tun Tuanku Bujang; Sapit Kepala Menteri, Tan Sri Datuk Amar Dr James Jemut Masing sereta Datuk Amar Awang Tengah Ali Hasan, Speaker Kunsil Nengeri (DUN), Datuk Amar Mohd. Asfia Awang Nassar, rintai menteri kabinet nengeri sereta bini sida, ketuai opis perintah, ketuai komuniti enggau ketuai kandang menua ke bukai.