Anda di sini

Rayat Sarawak landik dalam nentuka pengidup sida empu

Advertisement
 Tun Taib disempulangka Abang Johari meresa kontijen maya ‘Istiadat Pebarisan’ enggau ‘Rapat Raksasa’ kemari.
MERESA: Tun Taib disempulangka Abang Johari meresa kontijen maya ‘Istiadat Pebarisan’ enggau ‘Rapat Raksasa’ kemari.

MIRI: Rayat Sarawak iya nya rayat ti pintar ulih nentuka pengidup sida iya empu enggau tuju kuing pengidup sida baka orang bukai ke udah mujur, pia ku Kepala Menteri Datuk Patinggi Abang Johari Tun Openg.

Ku iya, Sarawak patut bejalaika singkang nyapai status nengeri maju nitihka chara kediri empu datai ba taun 2030.

“Anak Sarawak iya nya bansa ke bisi pengandal sereta enda bepanggai ba ‘tongkat’ ti disediaka orang bukai,” ku iya.

Pia mega ku Abang Johari, ba baruh Atur Pemansang Malaysia ke-12Istiadat Perbarisan’ enggau ‘Rapat Raksasa’ beserimbai Pengerami Ngintu Pengada Ke-83 Tuai Megai Menua (TYT) Tun Pehin Sri Abdul Taib Mahmud di Stadium Miri, kemari.

Sentang pengerami ngintu pengada TYT nya, Abang Johari mandangka Tun Pehin Sri Abdul Taib Mahmud nya siku ketuai ti mayuh udah ngemansangka nengeri enggau menua tu.

Ku iya nerang, sekumbang Sarawak diberi kuasa ‘self-rule’ enggau penumbuh Malaysia 56 taun ti udah, Tun Pehin Sri Abdul Taib Mahmud udah mandangka penau ngenegapka penyerakup rayat pupu raban bansa, asal enggau pengarap di serata Sarawak.

“Penyerakup rayat Sarawak udah lama ditanggam enggau ditegapka ari baruh pegai Tun Pehin Sri Abdul Taib Mahmud pengelama timpuh TYT nyadi Kepala Menteri Sarawak ari taun 1981 ngagai 2014.

“Pia mega, iya udah mantaika tanggungpengawa iya nyadi ketuai perintah ti bisi visyen jauh dalam juluk deka mai pemansang timpuh panjai ngagai Sarawak enggau rayat Sarawak nengah program industri ke ngena pemansut kuasa karan ke tau dikena.

“Beserimbai ngintu pengada ke-38 Tun Taib, kitai besampi ngambi Allah SWT meruan nyaga pengelikun enggau pengerai iya sereta Toh Puan lalu semampai nyadi payung pengelantang enggau pengellikun nengeri Sarawak,” ku iya.

Ku Abang Johari, penatai mensia mayuh kandang menua Miri ngintu pengada TYT nyadi siti institusyen ti mandangka penyerakup rayat Sarawak enda ngira bansa enggau jalai pengarap.

“Sarawak tampak rita nengah adat basa rayat ti bela bebasaka pangan diri lalu nadai isu bekaul enggau pengarap.

“Pia mega, perintah Sarawak ngembuan initiatif dikena mantu semua pengarap, enda ngira pengarap Islam ti deka bisi rumah enggau perengkaguna sembiang ke lebih manah nengah Unit Pekara Jalai Pengarap Bukai (UNIFOR),” ku iya nerang.

Sama bisi datai iya nya, Toh Puan Datuk Patinggi Ragad Kurdi Taib, bini Kepala Menteri, Datin Patinggi Datuk Amar Juma’ani Tuanku Bujang, Speaker Kunsil Nengeri (DUN), Datuk Amar Mohamad Asfia Awang Nassar; Sapit Kepala Menteri, Datuk Amar Douglas Uggah Embas enggau Datuk Amar Awang Tengah Ali Hasan, Menteri Perengka Pengangkut, Datuk Lee Kim Shin; Menteri ba Opis Kepala Menteri (Integriti enggau Ombudsman) ke mega menteri ke megai tanggungpengawa pengerami Datuk Talib Zulpilip, menteri kabinet sereta temuai ti dipebasa ke bukai.

Pengawa ‘istiadat pembarisan’ enggau ‘rapat raksasa’ ti mungkur bemacham bengkah kontijen udah digulu beribu iku temuai ke datai lalu bisi dipandangka tanda sereta  belakun.

Advertisement