Anda di sini

DNC deka ngatur seminar ‘Religious Freedom and Nation Building’ kena 9 Nov

Advertisement
 Patrick (duduk, empat ari kanan) sereta disempulang Paul (duduk, tiga ari kanan) enggau kaban komiti seminar ‘Religious Freedom and Nation Building’ DNC 2019 ngelaluka penatai mensia mayuh ngagi seminar nya kena 9 November ila.
ARAM DATAI: Patrick (duduk, empat ari kanan) sereta disempulang Paul (duduk, tiga ari kanan) enggau kaban komiti seminar ‘Religious Freedom and Nation Building’ DNC 2019 ngelaluka penatai mensia mayuh ngagi seminar nya kena 9 November ila.

KUCHING: Dayak National Congress (DNC) deka ngatur seminar ‘Religious Freedom and Nation Building’ kena 9 November 2019 ba Dewan DBNA ditu.

Chairman Pengatur DNC Seminar 2019, Patrick Sibat Sujang madahka seminar nya ngena tema ‘Religion Without Compulsion’ tebuka ngagai mensia mayuh sereta nadai bebayar.

“Entara objektif seminar tu diatur iya nya dikena ngajar sereta meri penyedar ngagai mensia mayuh tauka rayat iya nya konstitusyen perintah besai bisi nyendiaka beberapa garis lalau ari sukut undang-undang pasal ngemeranka jalai pegnarap ti nadai betagang (freedom of believe) di menua tu.

“Nambahka nya objektif kami deka minta sereta meransang mensia mayuh tauka rayat ngambi terus ngembuan semangat toleransi enggau beserakup dalam menua Malaysia ti mayuh bansa enggau jalai pengarap enggau pengidup,” ku iya.

Patrick mansutka pekara nya dalam aum pemberita Dayak National Congress (DNC) Seminar 2019 ‘Religious Freedom and Nation Building’ ti diatur ba sebuah hotel ditu, kemari.

Nitihku iya bisi empat topik tauka keretas kereja deka dipejuraika maya seminar nya ila.

Lalu asil ari seminar nya, resolusyen deka diberi ngagai perintah besai enggau nengeri.

“Kami nagit urung 650 iku pesereta seminar laban seminar tu tebuka ngagai mensia mayuh sereta organisasyen,” ku iya.

Nambahka nya Presiden DNC Paul Raja madahka nama pekara ke deka dikenataika nengah seminar ke diatur iya nya bekaul enggau toleransi tauka deka nyambut penemu orang bukai.

Ku iya, ba menua kitai Malaysia semua orang diberi awak tauka bisi endur dalam menua tu.

“Semua orang diberi peluang belimpah betuah sereta diberi peluang sekalika ba enda ngira kereja, latih enggau ke bukai ngambika kitai ulih sama ngemansangka menua tu,” ku iya ti mega nyadi penyanding penemu seminar.

Mensia mayuh ke deka ngerejister diri enggau seminar tu tau betelefon ngagai Bunsin Kalun (019-6686947), Valentine Tani (012-8303803) tauka Henry M. Sait ba lumur 017-2615199 kena 26 Oktober 2019.

Penerang silik tau ditanya ngagai Bunie Japah 019-8894905.

Sama bisi ba aum pemberita nya, penyanding penemu seminar nya Mengga Mikui enggau Datuk John Tenewi; Sapit Chairman Pengatur Dr Tamoi Tanggu enggau Kaban Komiti seminar nya.

Advertisement