Anda di sini

Bajet 2020 enda ngemeratka raban ex-polis ti bebendar ngetanka pengelikun menua

Advertisement
WAN JUNAIDI
WAN JUNAIDI

KUCHING: Kaban Parlimen Santubong, Datuk Seri Wan Junaidi Tuanku Jaafar madahka Perambu Belanja 2020 enda ngemeratka raban ex-polis ti kala berambun nyawa ngelaban komunis.

Iya madahka perambu belanja perintah besai nya enda patut ninggalka Ex-polis sereta nadai patut bisi diskriminasi.

Taja pia ku iya, penerima Pingat Jasa Malaysia (PJM) veteran soldadu diungkupka sekali meri RM500 diberi ngagai soldadu ti gawa maya darurat keterubah 1948 ngagai 1960 enggau darurat kedua ari taun 1989.

“Perambu Belanja 2020 udah enda ngemeratka enda ngaku enggau enda beterima kasih ngagai pemendar raban ex-polis ti ngelaban komunis dalam tiga darurat di Malaysia.

“Ex-polis ti bebendar ngelaban komunis dalam darurat keterubah 1094 ngagai 1960 enggau darurat kedua ari taun 1969 ngagai 1989 sereta darurat Sarawak ari taun 1962 ngagai 1990 iya nya penerima Pingat Jasa pahlawan Negara (PJPN). PJPN tu pingat terima kasih dikemendarka ba 2014 ngagai ex-polis dalam tiga darurat nya.

“Pemendar raban ex-polis tu, dipeda enda dikenang perintah pakatan Harapan (PH) sereta diskriminasi ti amat nyata. Pekara ti baka tu enda patut nyadi lalu enda ulih diterima,” ku iya madah ngagai Utusan Borneo bekaul enggau Perambu Belanja 2020 ti dibantai kena 11 Oktober tu tadi.

Menteri Wang, Lim Guan Eng lebuh ke mantaika perambu belanja nya dalam Dewan Rakyat madahka, perintah ngenang pemendar raban soldadu, lebih agi pemegai PJM.

Nya alai ku iya, bayar sekali meri sepenyampau RM500 deka diberi ngagai nyau deka manggai 70,000 pemegai PJM ti begunaka ungkup belanja sepenyampau RM35 juta.

  • oleh
  • Advertisement