KUCHING: Perambu Belanja 2020 ti udah dibantai kena 11 Oktober tu tadi manah tang ngasaka peranak Sarawak.
Menteri Dagang Temuai, Seni enggau Main Asal Datuk Abdul Karim Rahman Hamzah madahka perambu belanja 2020 nya enda ngamatka pekara ti udah disemaya Pengawa Bepilih Besai ke-14 (PRU14) suba.
“Perambu belanja 2020 iya nya perambu ti chukup silik sereta manah enti dibandingka enggau perambu belanja 2019 ti dibantaika taun nyyin kemari tang ngasaka (disappointment) Sarawak.
“Perambu belanja nya enda ngemeratka semaya ke digaga ungkup Sarawak maya Pengawa Bepilih Besai ke-14 (PRU14) suba, baka 50 peratus chukai ke digumpul diberi pulai ke Sarawak, 20 peratus royalti minyak enggau ke bukai,” ku iya madah ngagai Utusan Borneo.
Abdul Karim ti mega Menteri Nembiak enggau Lumba enggau Main madahka pekara nya lebuh ti ngenang Perambu Belanja 2020 ti dibantaika Menteri Wang Lim Guan Eng kena 11 Oktober tu tadi.
Nambahka nya lebuh ke ngenang pasal geran khas ti belipat diberi ngagai Sarawak, Abdul Karim madahka, penyampau nya ukai penyampau ke ulih dikemegahka.
Kebuah pia ku iya laban penyampau nya senda setipak enggau Sarawak ti sama pemesai enggau semua Semenanjung Malaysia.
“Iya...perambu belanja ke baru tu bisi nyebut pasal geran khas tang angka nya ukai ngemegahka laban Sarawak sebuah menua ti sama besai enggau Semenajung Malaysia.
“Meri geran urung RM32 milion ungkup geran khas disema baka meri ‘teda pemakai’ ngagai rayat Sarawak,” ku iya ti mega Naib Presiden Parti Pesaka Bumiputera Bersatu (PBB).
Kelimpah ari nya lebuh ke ngenang belanja pemansang ke diberi ngagai Sarawak, Abdul Karim madahka ba aspemk pemansang fizikal, Sarawak tau enda ibuh ingatka deka ‘sama ikas’ enggau Semenanjung Malaysia.
Takah pemansang entara Sarawak enggau Semanjung Malaysia deka majak besai, ku iya.
Guan Eng lebuh mantaika perambu belanja 2020 kena 11 Oktober tu tadi madahka, Sabah enggau Sarawak mengkang nyadi nengeri ti nerima Belanja Pemansang ti pemadu tinggi enggau ungkup belanja sepenyampau RM5.2 bilion (Sabah) enggau RM4.4 bilion Sarawak.
Ku iya, ungkup belanja nya nunjukka perintah Pakatan Harapan ngemeratka peminta guna Sabah enggau Sarawak baka ti ditetepka ari baruh Perjanjian Malaysia 1963.