MIRI: Kepala Menteri Datuk Patinggi Abang Johari Tun Openg enda puas ati ba agih belanja ngangkatmanah sekula repuk ti beungkus RM735 juta ke udah dipadah maya mantaika Belanja 2020.
Abang Johari madah, iya ngarapka agih belanja mayuh agi laban sektor pelajar di nengeri tu ba tikas pemadu baruh kelebih agi ari sukut infrastruktur.
“Agih belanja tu ungkup serata menua, aku ngarapka mayuh agi ari penyampau belanja ke dipadah. Ari puku rata agih belanja, aku puas ati enggau nya,” ku iya lebuh dikerandau pengarang berita pengudah ngulu pengawa ‘Istiadat Pengurniaan Darjah-darjah Kebesaran Negeri Sarawak’ ari Tuai Megai Menua Nengeri Sarawak Tun Pehin Sri Abdul Taib Mahmud di Hotel Mega kemari.
Kemari, Menteri Pekara Wang, Lim Guan Eng, maya mantaika agih Belanja 2020 madah, perintah deka ngemeratka ba pekara ngangkatmanah sekula repuk nengah agih belanja sepenyampau RM735 juta ba taun 2020, kelebih agi di Sabah enggau Sarawak.
Ku iya, perintah deka terus ngungkupka belanja dikena ngaga sekula baru seriris enggau populasyen peranak ke majak niki.
Nitihka Lim Guan Eng, dikena nentuka sekula bisi nyendiaka gaya proses pelajar ke lebih kondusif ungkup nembiak, perintah deka nambah agih belanja dikena ngangkatmanah sekula ari RM652 juta baka ke udah dibantai dalam Belanja 2019 ngagai RM735 juta ba taun 2020.
Lebuh dirandau sekalika Sarawak deka minta program subsidi petrol ungkup B40 dikena ngurangka tikas ungkus pengidup rayat, Abang Johari madah nya bepanggai ba perintah besai.
“Kitai enda ngarapka seratus peratus ari sida (perintah besai). Sida madah bisi penanggul ba belanja, nya alai kitai enda ngarap,” ku iya.
Subsidi nya dipejalaika berengkah 1 Januari taun baru ila ti ditetapka RM30 sebulan ungkup kerita enggau RM12 sebulan ungkup motosikal lalu nya dipejalaika di Semenanjung Malaysia aja.